ساڵح محەمەد ئەلعیڕاقی كە بە وەزیرەكەی سەدر ناسراوە، لەبارەی قەدەغەكردنی چوونی ژنان بۆ مزگەوت و نوێژكردنیان بە جەماعەت لە مزگەوت هاتەدەنگ و دەڵێت، محمەد سادق سەدر ڕێگەی بە ژنانی بنەماڵەكەیان دەدا بچنە مزگەوت.
ماوەی چەند ڕۆژێكە پرسی ڕێگریكردن لە چوونی ژنان بۆ مزگەوت بووەتە ڕای گشتی لە عێراق و هەوڵێك هەیە بۆ دەركردنی بڕیارێكی لەو جۆرە.
ئەلعیڕاقی ئەمڕۆ سێشەممە لە تویتێكدا باس لەوە دەكات كە محەمەد سادق سەدر باوكی موقتەدا سەدر كە یەكێك بوو لە مەرجەعە گەورەكانی شیعە، ڕێگەی بە ژنان داوە بچنە مزگەوت و ژنانی بنەماڵەكەیان پابەندی چوونە مزگەوت و ئەنجامدانی نوێژی هەینی لە مزگەوتی كوفە بوون.
وەزیرەكەی سەدر نووسیویەتی، “ئەگەر چوونی ژنان بۆ مزگەوت سەرپێچیی شەرعی یاخود ئاكاری تیادایە، ئەی بۆچی سەید محەمەد سادق سەدر ڕێگەی بەو كارە دەدا؟ ئیدی بۆچی ئێوە ڕێگە بە ژنەكانتان نادەن بچنە مزگەوت؟!”.
