وەزارەتی تەندروستی حكومەتی هەرێمی كوردستان لە نووسراوێكدا كە ئاڕاستەی سەرجەم بەڕێوەبەرایەتییەكانی پارێزگا و ئیدارە سەربەخۆكانی كردووە، رایگەیاند، لە پێناو بەرژەوەندیی گشتی و پێشكەشكردنی خزمەتگوزاریی تەندروستی لە ڕۆژانی پشووی جەژنی قوربان چەند ڕێنماییەكی نوێ دەركراون كە بریتین لە:-
یەكەم/ دانانی لیژنەی بەدواداچوون لە سەرجەم بەڕێوەبەرایەتییە گشتییەكان و نەخۆشخانەكان.
دووەم/ بۆ هەر كارێكی پێویست و لەناكاو، پێویستە هێڵی گەرمی پەیوەندی هەبێت.
سێیەم/ لە كاتی پێویستدا كۆگاكانی دەرمان و پێداویستی پزیشكی و تاقیگەیی لە سەرجەم شار و شارۆچكەكان كراوە دەبن.
چوارەم/ پابەندبوونی پزیشكانی پسپۆڕ و نیشتەجێی دێرین، خولاو، پەرستار و كارمەندانی تەندروستی بە دەوامی ئێشكگرییەوە.
پێنجەم/ هاتنە ژوورەی ڕاگەیاندن تەنها لە ڕێگەی ڕاگەیاندنی بەڕێوەبەرایەتییەكانەوە دەبێت.
شەشەم/ ئاماری ڕۆژانە دەبێت لە ماوەی (24) كاتژمێر لە ڕێگای پەیوەندیی مۆبایلەوە لە (8)ـی بەیانی تاوەكو (8)ـی بەیانی ڕۆژی دواتر بۆ بەڕێوەبەرایەتییە گشتییەكان ڕەوانە بكرێت.
حەوتەم/ ڕۆژانە فۆرمی تایبەت بە ئامارەكان بۆ بەڕێوەبەرایەتییە گشتییەكان ڕەوانە بكرێت.
هەشتەم/ ئامادەباشی بۆ ئەمبۆڵانس و دابینكردنی گاز و بەنزین و سووتەمەنییەكان بكرێت.
نۆیەم /بەدواداچوونی بەردەوام بۆر پڕۆژەكانی خاوێنكردنەوە و دابینكردنی خۆراك بكرێت.
دەیەم/ هێڵەكانی مۆبایلی بەرپرس و بەشەكان كراوە بن و وەڵام بدرێنەوە.
یانزەیەم/ نەخۆشخانەكانی فریاكەون و نۆرینگە دەرەكییەكان كراوە بن و هەموو سەردان و زانیارییەكان تایبەت بە نەخۆش تۆمار بكرێن.
دوانزەیەم/ سەنتەرەكانی پێدانی چارەسەری كیمیاویی بۆ نەخۆشانی شێرپەنجە پێویستە بە شێوەی ئێشكگری كراوە بن.
سیانزەیەم/ سەنتەرەكانی شووشتنی گورچیلە پێویستە بە شێوەی ئێشكگری كراوە بن.
چواردەیەم/ تیمەكانی فریاگوزاری و هێڵی (122) بەردەوامدەبن لە ئەرك و كارەكانیان بە شێوەی (24) كاتژمێری و هۆبەی پزیشكی فریاكەوتن خشتەی دابینكردنی تیمەكانی بۆ شوێنەكانی پێویست و گەشتیاری دادەنێت.
پانزەیەم/ تیمەكانی (پشكنینی ئاوی خواردنەوەی ماڵان و نەخۆشییە گوازراوەكان و چاودێری تەندروستی) بەردەوامبن لە بەدواداچوونەكانیان بە شێوەی ئێشكگری.
شانزەیەم/ پێشكەشكردنی خزمەتگوزاریی تەندروستی بۆ ئاوارەكان لە كامپەكان بەردەوامبێت.
حەڤدەیەم/ بەردەوامبوون لە پێشكەشكردنی خزمەتگوزارییەكانی پشكنینی كۆرۆنا و چارەسەرییەكانیان.
هەژدەیەم/ دانانی میكانیزمێكی گونجاو بۆ پێدانی ڤاكسین لە ڕۆژانی پشوو و لە كاتی پێویستدا.
