ئاژانسی ناسا ئاشکرایکرد، پەیوەندییان لەگەڵ کەشتییەکی ئاسمانی پچڕاوە کە ڕەوانەی سەر مانگیان کردووە بەمەبەستی تاقیکردنەوەی هاوسەنگیی خولگەی مانگ، بەهای ئەو کەشتییە ئاسمانییە 32.7 ملیۆن دۆلارە.
ئاژانسی ناسا ڕایگەیاندووە، دوای ئەوەی ڕۆژی دووشەممە پەیوەندییەکی سەرکەوتوویان لەگەڵ کەشتیی کاپستۆن ئەنجامداوە، دواتر نەیانتوانیوە هیچ پەیوەندییەکی دیکەی پێوە بکەن.
سارە فرایزەر وتەبێژی ناسا لەوبارەیەوە دەڵێت، ئەندازیارانی تایبەتمەند لە هەوڵی ئەوەدان هۆکاری پچڕانی پەیوەندییان لەگەڵ کەشتییەکە بزانن، هەروەها گەشبینن بە دووبارە چاککردنەوەی پەیوەندییان بە کەشتییەکەوە.
فرایزەر ئاماژەی بەوەکردووە، کەشتییە ئاسمانییەکە لە 28ی مانگی حوزەیراندا ڕەوانەکراوە و ماوەی هەفتەیەک لە خولگەی دەوری زەوی ماوەتەوە، دواتر بە سەرکەوتووی بەرەو خولگەی مانگ بەڕێکەوت.
