جێگری بەڕێوەبەری گشتیی گواستنەوە و گەیاندنی سلێمانی ئاشكرایدەكات، لۆگۆ بەو ئۆتۆمبێلە تاكسییانە نادرێت كە ڕەنگیان و سوور و سپییە و جەختیشدەكاتەوە لە ئێستادا شۆفێرانی تاكسی كە ڕەنگی ئۆتۆمبێلەكەيان “بۆرە”دەتوانن سەردانیان بكەن و سزای دارایی نادرێن.
ئامانج دەروێش جێگری بەرێوەبەری گشتیی گواستنەوە و گەیاندنی سلێمانی لە لێدوانێكدا بە تۆڕی میدیایی ئێستای ڕایگەیاند، لە ئێستادا شۆفێرانی تاكسی دەتوانن سەردانمان بكەن و مامەڵە بكەن بەمەبەستی وەرگرتنی لۆگۆی تایبەت بە ئۆتۆمبێلی تاكسی و سزای دارایی نادرێن كە تائێستا لۆگۆكەیان وەرنەگرتووە.
ئاشكرایكرد، ئەو تاكسيیانەی ڕەنگیان”سوور و سپییە”و تابلۆی پارێزگاكانی ناوەڕاست و باشووری عێراقن لۆگۆیان پێنادرێت و هیچ بڕیار و ڕێنماییەكی نوێ نەدراوە كە لۆگۆیان پێبدرێـت.
ئاماژەی بەوەشكرد، “لە ئێستادا لۆگۆكان تەنها بە ئۆتۆمبێلی تاكسی دەدرێت و هیچ بڕیار و ڕێنماییەكمان ئاراستە نەكراوە بۆ پێدانی ئەو لۆگۆیانە بە پاسی هێڵەكانی ناوشار و دەرەوەی شار”.
