زانایەكی ڕوس وادەی توانەوەی بەستەڵەكی باكوور ئاشكرادەكات و دەڵێت، هاوینان بەبێ بەفر دەبێت.
ئەلیساندەر ماكارۆڤ بەڕێوەبەری پەیمانگەی لێكۆڵینەوە لە هەردوو جەمسەری باكوور و باشوور، شیكارییەكی زانستییانەی بۆ پلەی گەرمی و دۆخی سەهۆڵبەندانی هەردوو كیشوەرەكە كردووە و ئاشكرایكرد، پێدەچێت تا كۆتایی ئەم سەدەیە، جەمسەری باكوور هاوینی بێبەفر بەڕێبكات.
بەپێی وتەی ماكارۆڤ، قەتیسبوونی گەرما و بەرزبوونەوەی پلەكانی گەرما بەردەوامدەبن، بەڵام لە جەمسەری باكوور پرۆسەكە دوو بۆ سێ هێندە خراترە بەراورد بە شوێنەكانی تری هەسارەی زەوی.
زانا ڕوسەكە پێشبینیدەكات لە ساڵانی نێوان 2030 – 2050 پلەكانی گەرما جێگیرببن و بەوەش توانەوەی سەهۆڵبەندانی جەمسەری باكوور كەمببێتەوە و كەش زۆر گەرم نەبێت.
دوای ئەو وادەیە و تا كۆتایی ئەم سەدەیە، پلەكانی گەرما زیاتر بەرزدەبنەوە و بەوەش سەهۆڵەندانی جەمسەری باكوور لە هاویندا بە تەواوەتی دەتوێتەوە، وەك ئەلیساندەر ماكارۆڤ شیكاریی بۆ كردووە و دەڵێت، “لە ماوەی 10 ساڵدا 13.5%ی سەهۆڵەندانی جەمسەری باكوور تواوەتەوە”.
