مەسرور بارزانی سەرۆکی حکومەتی هەرێمی کوردستان، دوای ڕووداوەکەی ئەمڕۆی گەڕەکی سورچیان کە تێیدا ژن و مێردێک کوژران پەیامێکی بڵاوکردەوە، بەوپێیە، داوای داخستنی سەرجەم شوێنەکانی فرۆشتنی چەک و دەستبەسەرداگرتنی چەکە بێمۆڵەتەکانی کردووە.
لە پەیامەکەی سەرۆکی حکومەتدا هاتووە، بۆ ئەوەی چیتر هەڕەشە بۆ سەر ژیانی خەڵک دروستنەبێت، داوای لە وەزارەتی ناوخۆ کردووە هەموو شوێنەکانی فرۆشتنی چەک دابخرێن و سەرجەم چەکە بێمۆڵەتەکانیش دەستیان بەسەردابگیرێت.
ڕایگەیاندووە، ” ئێمە ئاسایشی خەڵک و وڵاتی خۆمان ناکەینە قوربانیی خراپەکاران و قاچاخچییان و هەلپەرستان”.
داوا لە خەڵکی کوردستانیش دەکات، چەکە بێمۆڵەتەکانیان ڕادەستی حکومەت بکەن و بەشداربن لە پرۆسەی پاککردنەوەی کوردستان لە چەکە بێمۆڵەتەکان.
ئاماژەی بەوەشکردووە، “دواتر بەپێی یاسا بابەتی مامەڵەکردن بە چەک ڕێکدەخرێتەوە”.
پەیامێکی مەسرور بارزانی بۆ دادگاکانە و داوا دەکات، چاوپۆشی و کەمتەرخەمی لە جێبەجێکردنی یاسا نەکەن، ” دڵنیاشیاندەکەمەوە کە بە هەموو شێوەیەک، پاڵپشت و هاوکاریان دەبین”.
