سەرۆکی یەکێتی و سه‌رۆكى هه‌رێم له‌گه‌ڵ فه‌رمانده‌ى هاوپه‌يمانان له عيراق و سوريا كۆبوونه‌وه و لەبارەی یەكخستنی پێشمەرگە پێشنیارێكی ئەمریكییەكان تاوتوێكرا.
ئه‌مڕۆ بافڵ جەلال تاڵەبانی سەرۆکی یەکێتیی نیشتمانیی کوردستان و نێچيرڤان بارزانى سه‌رۆكى هه‌رێمى كوردستان و فه‌رمانده‌ى گشتيى هێزى پێشمه‌رگه‌ى كوردستان، پێشوازىیان له جه‌نه‌راڵ جۆن برێنان فه‌رمانده‌ى هێزه‌كانى هاوپه‌يمانان له عيراق و سوريا و شاندێكى باڵاى سه‌ربازيى ياوه‌رى كرد.
له كۆبوونه‌وه‌يه‌كدا كە وه‌زيرى پێشمه‌رگه و سەرۆکی ئاژانسی پاراستن و زانیاری – زانیاری ھەرێم و سوپاسالارى پێشمه‌رگه و ژماره‌يه‌ك له فه‌رمانده و پله‌دارانى پێشمه‌رگه ئاماده‌بوون، پرۆسه‌ى چاكسازى له وه‌زاره‌تى پێشمه‌رگه و دوايين هه‌نگاوه‌كانى يه‌كخستنه‌وه‌ى هێزى پێشمه‌رگه و گرفته‌كانى به‌رده‌م پرۆسه‌كه و پێشنيارێكى ئه‌مريكييه‌كان له‌مباره‌يه‌وه تاوتوێ كران.
بافڵ جەلال تاڵەبانی سوپاس و پێزانینی دەربڕی بۆ ھێزەکانی ئەمریکا و ھاوپەیمانانی نێودەوڵەتی کە لە جەنگی ڕووبەڕووبوونەوەی تیرۆریستانی داعش ھاوکاری ھەرێم بوون و پشتیوانی ھێزی پێشمەرگەبوون لە ڕووی مەشق و ڕاھێنان و پڕچەکردن و پێشخستنی توانا سەربازییەکان و ڕوونیشیکردەوە، پەرۆشیتان بۆ یەکخستن و چاکسازیکردن لە وەزارەتی پێشمەرگە مایەی دەستخۆشیە و سوپاسگوزارین و ڕاشیگەیاند، ھەر پلانێک بۆ ڕێکخستنەوەی ھێزی پێشمەرگە بنرێت پێشوازی لێدەکەین، بەڵام پێویستە لەم ھەنگاوەدا ھەلومەرجی ھەرێم و واقیعی ئەمڕۆ لەبەرچاوبگیرێت و ھاوسەنگی بنەمابێت بۆ سەرخستنی ئەم پڕۆژە نیشتمانییە و بە بەرنامەی کوردستانی بیخەینە بواری جێبەجێکردنەوە و ھەر ھەنگاوێکیش بنرێت دەبێت لە خزمەتی پاراستنی ئاسایشی ھەرێم بێت.
ھەر لە کۆبوونەوەکەدا نێچيرڤان بارزانى سوپاسى و پێزانينى هه‌رێمى كوردستانى بۆ ئهمريكا و هاوپه‌يمانان دووپاتكرده‌وه بۆ ئه‌و پشتگيرى و هاوكارييه‌ى له‌كاتى شه‌ڕى دژى داعشدا و ئێستاش پێشكه‌ش به پێشمه‌رگه‌ى ده‌كه‌ن و جه‌ختى له پشتگيريى سه‌رۆكايه‌تيى هه‌رێم و حكومه‌تى هه‌رێمى كوردستان بۆ پرۆسه‌ى چاكسازيى له وه‌زاره‌تى پێشمه‌رگه و يه‌كخستنه‌وه‌ى پێشمه‌رگه كرده‌وه.
لاى خۆيه‌وه جه‌نه‌رال برێنان دووپاتیكرده‌وه ئهمريكا له پشتگيرى و يارمه‌تيدانى پێشمه‌رگه به‌رده‌وام ده‌بێت بۆ ئه‌وه‌ى له‌ژێر چه‌ترى وه‌زاره‌تى پێشمه‌رگه و يه‌ك فه‌رمانده‌ييدا كۆبكرێته‌وه و بكرێته هێزێكى نيشتانيى پيشه‌گه‌ر كه به‌هێز و بەتوانا بێت بتوانێت ئه‌ركى خۆى جێبه‌جێ بكات.
دوايين پێشهاته‌كانى شه‌ڕى دژى تيرۆر و پێويستيى هاريكاريى نێوان پێشمه‌رگه و سوپاى عيراق و به‌رده‌واميى پشتگيريى هاوپه‌يمانيى نێوده‌وڵه‌تيى بۆ عيراق و هه‌رێمى كوردستان، ته‌وه‌رێکی ديكه‌ى كۆبوونه‌وه‌كه بوو.
