چوار پەرلەمانتاری كورد لە بەغداد پشتیوانی لە ڕێككەوتنی نێوان هەردوو حكومەتی عێراق و هەرێم دەكەن و دەشڵێن، بۆ کۆتایی هێنان بە کێشەی موچە و شایستە داراییەکانی تری بانگهێشتی حکومەتی هەرێم دەکەین بۆ هەنگاوی بەپەلە و كرداری.
لە ڕاگەیەنراوە هاوبەشەكەدا كە ئەمڕۆ چوارشەممە 25ی تشرینی دووەم لەلایەن چوار ئەندامی كوردی لیژنەی دارایی ئەنجومەنی نوێنەرانی عێراق بڵاوكراوەتەوە هاتووە، پشتیوانی لە ڕێکەوتنی دەستوری و یاسایی نێوان هەردوو حکومەتی فیدراڵی عێراق و حکومەتی هەرێمی کوردستان دەکەین.
دەشڵێن، “لە پێناوی کۆتایی هێنان بە کێشەی موچەی فەرمانبەرانی هەرێمی کوردستان و شایستە داراییەکانی تری هەرێم لە نێویاندا پێشمەرگە و جوتیاران و تێکرای شایستە دارییەکانی تر، بانگهێشتی حکومەتی هەرێمی کوردستان دەکەین بۆ هەنگاونانی بە پەلە و کرداری بە شێوەیەکی شەفاف و ڕون لەگەڵ حکومەتی عێراق و دەزگا پەیوەندیدارەکانی و پابەندبوون بەو دەقە دەستوری و یاساییانەی کە وا دەکات پشکی سێ مانگی کۆتایی ساڵی 2020 و پشکی هەرێم لە یاسای موازەنەی ساڵی 2021 بکاتە دەرفەتی ئاسایی بونەوەی موچە و بودجە و ژیانی هاوڵاتیانی هەرێم”.
لە بەشێكی دیكەی ڕاگەیەنراوەكە، كە لەلایەن پەرلەمانتاران (ئەحمەد حاجی رەشید، جەمال کۆچەر، شیروان میرزا، هۆشیار عەبدوڵا) واژووكراوە، دەڵێن، بەوپەڕی ڕاشکاوییەوە ڕایدەگەیەنین ئیدی کاتیەتی و کاری جدیش بۆ ئەوە دەکەین کە داهاتی نەوت و داهاتەکانی تری هەرێمی کوردستان تەنها لە خزمەتی هاونیشتیمانیاندا بەکاربهێنرێن.
