وەزارەتی خوێندنی باڵا لە هەموو زانکۆکان و دامو دەزگاکانی دیکەی سەر بە وەزارەتەکەی قەدەغەکرد، داوای کارتی دەنگدان بکەن لە مامۆستا و فەرمانبەر و خوێندکار.
لە نووسراوێکی وەزارەتی خوێندنی باڵادا، کە ئەمڕۆ دەرچووە و ئاڕاستەی گشت زانکۆکان و ئەنجومەنی باڵای کوردستان بۆ پسپۆڕایەتییە پزیشکییەکان و دەستەی کوردستانی بۆ دیراساتی ستراتیژی و توێژینەوەی زانستی کراوە، ئاماژە بەوەکراوە، داواکاری کارتی دەنگدان بە هەموو جۆرێک قەدەغەیە و رێگە پێدراو نییە.
نووسراوەکە کە واژووی د. توانا نەجەف محەمەدخان، بەڕێوەبەری گشتی فەرمانگەی کارگێڕی و دارایی لەسەرە تێیدا هاتووە، “لەپێناو پابەندبوون بە بنەما دەستووری و یاساییەکان و مافەکانی مرۆڤ، هیچ زانکۆیەک و دامودەزگایەکی تری سەر بە وەزارەتەکەمان، بۆ هیچ مەبەستێک رێگەپێدراو نییە داوای کارتی دەنگدان لە مامۆستایان و فەرمانبەران و خوێندکاران و قوتابیانی زانکۆکان بکات، بەپێچەوانەوە لایەنی سەرپێچیکار رووبەڕووی سزای یاسایی دەبێتەوە”.
