ڕێكخراوێكی بواری پەنابەران دەڵێت، سەرەڕای ڕووداوەكان كۆچی نایاسایی لە هەرێمی كوردستانەوە بۆ دەرەوەی وڵات بەردەوامی هەیە داواشدەكات لەپێناو كەمكردنەوەی كۆچ ڕەوشی ژیانی خەڵك باشبكرێت.
دەزگای لوتكە بۆ كاروباری ئاوارە و پەنابەران ڕایگەیاند، بەداخەوە بەهۆی خەمساردی لایەنە پەیوەندیدارەکان و ئەو بارودۆخە نەخوازراوەی لە عێراق و هەرێمی کوردستاندا دروستبووە، کۆچی نایاسایی بۆ وڵاتانی دەرەوە و بەشێوەیەکی بەرچاو بەردەوامی هەیە.
ڕێكخراوەكە لە ڕاگەیەندراوێكدا بەبۆنەی ڕۆژی جیهانیی پەنابەران دەشڵێت، “ئەرکی هەموو لایەکمان و بەتایبەت حکومەت و لایەنە پەیوەندیدارەکانە کە هەوڵی جدی بدەن بۆ کەمکردنەوەی ئەو ڕێژە بەرزەی کۆچی نایاسایی كە لەئێستادا هەیە و بەداخەوە ڕوو لە زیاتربوونیش دەکات”.
لە پاش ڕووخاندنی ڕژێمی بەعش بەهۆی خۆشگوزەرانیی هاوڵاتییانەوە، كۆچی پێچەوانە لە ئەوروپاوە دەستیپێكرد و ژمارەیەكی زۆر لە هاوڵاتییانی كورد گەڕانەوە، وەك ئەوەی دەزگای لوتكە ئاماژەی پێداوە و دەڵێت، “دەکرێت ئەمە دووبارە بکرێتەوە، ئەمەش تەنها بە خەمخۆریی لایەنە پەیوەندیدارەکان دەبێت”.
داواشیكردووە لەپێناو کەمکردنەوەی کۆچی گەنجان، ڕەوشی ژیانی هاوڵاتییان باشتربکرێت، لەڕێی ڕەخساندنی هەلی کار بۆ گەنجان و کردنەوەی کارگە و زیاتر پەرەپێدانی کەرتی پیشەسازی و ئابوریی وڵات، دوبارە بەگەڕخستنەوەی پێشینەکان و قەرزی بچوک و گەورە.
ئەمڕۆ 20ی حوزەیران لەلایەن ڕێكخراوی نەتەوە یەکگرتووەکانەوە بە ڕۆژی جیهانیی پەنابەران دیاریكراوە.
بەپێی ڕاگەیەندراوی ئەمساڵی ڕێكخراوەكە لە هەر خولەکێکدا 20 کەس شوێنەکانیان بەجێدەهێڵن بەشێوەی زۆرەملێ چ بەهۆی جەنگ، توندوتیژی یان تیرۆرەوە بێت.
لەكاتێكی پێشتری ئەمڕۆدا دەزگای لوتکە ئاماری ئاوارە و پەنابەرانی عێراقیی لە هەشت ساڵی ڕابردوودا بڵاوکردەوە، بەپێی ئامارەکە لەو ماوەیەدا 690 هەزار و 444 هاوڵاتیی عێراقی بوون بە پەنابەر.
هەروەها 316 پەنابەری عێراقی گیانیان لەدەستداوە، 225 کەس بێسەروشوێن بوون.
