عێراق دەیەوێت هەناردەی نەوت زیادبكات بۆ هەشت ملیۆن بەرمیل لە ڕۆژێكدا، وەزیری نەوت دەڵێت، دەچمە فەرەنسا وەبەرهێنەران دەهێنم.
وەزیری نەوتی عێراق ئاشكرایكرد، سەردانی فەرەنسا دەكات و ئامانجی هێنانی وەبەرهێنەرانی ئەو وڵاتەیە بۆ كاركردن لە هەردوو كەرتی نەوت و غازی سروشتیی عێراقدا.
ئیحسان عەبدولجەبار وەزیری نەوتی عێراق لە لێدوانێكدا بۆ ئاژانسی هەواڵی فرانس پرێس ڕایگەیاند، سەردانی فەرەنسا دەكات و لەگەڵ نوێنەرانی كۆمپانیا گرنگەكاندا كۆدەبێتەوە و پەیامێكی بازرگانییان پێدەگەیەنێت و وتی، “پیشەسازییەكی زەبەلاحی نەوتمان هەیە و دەمانەوێت زۆرترین لایەنی كاریگەر بێنە عێراق و ڕكابەریی بكەن”.
ئێستا عێراق ڕۆژانە 4.5 ملیۆن بەرمیل نەوت هەناردە دەكات، ئیحسان عەبدولجەبار ئاشكرایكردووە كە دەیانەوێت قەبارەی بەرهەمهێنان و هەناردەكردنی نەوت تا ساڵی 2027 بگەیەنن بە هەشت ملیۆن بەرمیل نەوتی ڕۆژانە، بۆ ئەوەش لەگەڵ وەبەرهێنەرانی جیهاندا گفتوگۆدەكەن.
