زمانی کوردیی ناوەندی بەشێوەیەكی فەرمی بۆ وەرگێڕی گووگڵ زیاددەکرێت و لەم چەند ڕۆژەدا كارادەبێت.
لە خزمەتگوزاریی وەرگێڕانی گووگڵدا كە تایبەتە بە نووسین و دوای دانانیان تێكستەكان ڕاستەوخۆ لە زمانێكەوە بۆ زمانێكی دیكە وەردەگێڕێت، زمانی كوردیی ناوەندی (سۆرانی) زیادكرا.
بەپێی كۆمپانیای گووگڵ، لە چەند ڕۆژی داهاتوودا خزمەتگوزارییەكە بۆ گشت بەكارهێنەرانی “گووگڵ ترانزڵەیت” كارادەبێت و بەكارهێنەران دەتوانن تێكستەكانیان لە زمانەكانی دیكەوە بۆ زمانی كوردی و بە پێچەوانەشەوە وەربگێڕن.
پێشتر شێوەزاری كرمانجیی سەروو بۆ وەرگێڕی گووگڵ زیادكراوە و ئەو خزمەتگوزارییە بەردەستە، لەگەڵ زیادكردنی شێوەزاری سۆرانی-شدا زمانی كوردی لەسەر تۆڕی ئینتەرنێت زیاتر بەرەوپێش دەچێت و دەناسرێت و كوردان ئاسانتر دەستیان دەگات بە زانیاری و دەق لە زمانەكانی تری جیهانەوە.
