ئەو شەپۆلی خۆڵبارینەی ماوەیەكە عێراقی گرتووەتەوە، بووەتەهۆی گیانلەدەستدانی 11 كەس و پسپۆڕان و ڕاپۆرتە نێودەوڵەتییەكان باس لە قۆناغێكی نوێی ژینگەیی دەكەن، كە كاریگەرییەكانی لەسەر عێراق گەورەتر دەبن.
بەپێی ڕاپۆرتەكانی تایبەت بە بواری ژینگە و گۆڕانكارییەكانی ئاووهەوا، عێراق دەبێتە پێنجەم وڵاتی جیهان لەڕووی زەرەرمەندبوونی لە گۆڕانی ئاووهەوا و دیاردەی بە بیابانبوون.
لە كۆی 40 ملیۆن دانیشتووان، ئامارەكان ئاشكرایانكردووە كە نزیكەی حەوت ملیۆن كەس لە عێراق خۆراك و ئاوی پێویستیان پێناگات و تا دێت ناوچە و ڕووبەری فراوانتری خاكەكەی بەتایبەت ناوچەكانی باشوور و خۆرئاوای عێراق دووچاری بە بیابانبوون دەبنەوە، هۆكارەكەشی جگە لە وشكەساڵی و كەمبوونەوەی بارانبارین، گرتنەوەی ئاوە لەلایەن ئێران و توركیاوە كە بووەتەهۆی كەمبوونەوەی ئاوی ڕووبار و دەریاچەكان و ئاوی ژێرزەوی.
