دەرباز محەمەد وەزیری پێشووی كۆچ و كۆچبەرانی عێراق دەڵێت، سەرۆکی جوڵانەوەی نەوەی نوێ تۆمەتی خستووەتەپاڵ وەزارەتەکە ئەو کاتەی كە ئەو وەزیر بووە و تۆمەتەكان بە ناڕەوا ناودەبات و جەختدەكاتەوە “دادگا سەنگی مەحەکە”.
لە ڕوونكردنەوەیەكدا دەرباز محەمەد ڕایگەیاند، “ئەمڕۆ سەرۆکی جوڵانەوەی نەوەی نوێ، لە کۆنفرانسێکی ڕۆژنامەنووسیدا ناوی وەزارەتی کۆچ و کۆچبەرانی (2014 -2018) هێناوە و تۆمەتی خستووەتەپاڵ وەزارەتەکە ئەو کاتەی بەندە وەزیری بووم”.
وەزیری پێشووی كۆچ و كۆچبەرانی عێراق كە لەسەر پشكی بزوتنەوەی گۆڕان لەو پۆستەدا بوو، جەختدەكاتەوە كە “سەرلەبەری ئەو تۆمەتانە ڕەتدەکەینەوە و دادگا سەنگی مەحەکە لە هەموو ئەو تۆمەتە ناڕەوایانە”.
دەشڵێت، “دەستەی دەستپاكییش ھیچکات بانگھێشتی بەندەی نەکردووە بۆ لێپرسینەوە، کە ئەگەر ڕاپۆرتی لەو شێوەیە ھەبووایە دەستەی دەستپاكی ڕێوشوێنی خۆی دەگرتەبەر”.
