دەستەی داكۆكی لە مامۆستایان و فەرمانبەرانی ناڕازی، ئەمڕۆ پێنج شەممە سەردانی بەغدادیان كرد و لە دادگای باڵای فیدڕاڵیی عێراق سكاڵایان تۆماركرد و داوای دەستپێكردنەوەی پلەبەرزكردنەوەی مامۆستایان و فەرمانبەران دەكەن.
سكاڵاكەی دەستەی داكۆكی لە مامۆستایان و فەرمانبەرانی ناڕازی، سەبارەت بە بڕیاری ڕاگرتنی پلەبەرزكردنەوەی مامۆستایان و فەرمانبەرانی هەرێمی كوردستانە كە حكومەتی هەرێم لە ساڵی 2016ەوە دەریكردووە و بڕیاری ڕاگرتنی پلەبەرزكردنەوەی فەرمانبەرانی داوە.
هەر لە راگەیەندراوی دەستەكەدا هاتووە، لە میانی چوونیان بۆ بەغداد، جەختیان لەسەر راستەوخۆ دابەشكردنی مووچە بە كارتی بانكی و كردووەتەوە و هەروەها زانیاری لەسەر بەڕێوەچوونی هەڵمەتی واژووكۆكردنەوە بۆ گواستنەوەی مووچەكانیان بۆ سەر بانك و وەرگرتنی لە رێگەی كارتی بانكییەوە كراوەتەوە.
ئاماژە بۆ ئەوەش كراوە، دەستەكە لەگەڵ جێگری یەكەمی سەرۆكی لیژنەی دارایی پەرلەمانی عێراقدا كۆبوونەتەوە و بە چڕیی باسی دۆخی ناهەمواری مامۆستایان و فەرمانبەران كرا بەهۆی دواكەوتنی دابەشكردنی مووچە و بایكۆتكردنی مامۆستایان و فەرمانبەرانەوە.
