ئەنفلۆنزای باڵندە سەریهەڵدایەوە و تووشبوونی یەكەم مرۆڤ بەم شەپۆلەی پەتاكە لە ئەمریكا تۆماركرا و ملیۆنان قەل و مریشك مرداربوونەتەوە.
تووشبووەكە زیندانییە لە گرتووخانەی كۆلۆرادۆ، ناوەندی ئەمریكا بۆ قەلاچۆكردنی نەخۆشییەكان و خۆپاراستن دەڵێت، تووشبووەكە پیاوێكە لە ماوەكانی كۆتایی سزای زیندانیكردندایە، ئەركی دەرهێنانی مریشك بووە لە كێڵگەیەك كە مریشكەكانی تووشی ئەنفلۆنزای باڵندە بوون.
لیزا وایلی وتەبێژی چاكسازییەكانی كۆلۆرادۆ ئاشكرایكردووە، تووشبووەكە و چەند زیندانییەكی تر براونەتە كێڵگەكە بۆ كوشتنی مریشكەكان و دەرهێنانیان و دەڵێت، 58 هەزار مریشك لەو كێڵگەیەدا تووشی ئەنفلۆنزا بووبوون.
ناوەندی كۆنترۆڵكردنی نەخۆشییەكان لە ئەمریكا، لەگەڵ ئەوەی هۆشداری بە خەڵك دەدات خۆیان لە تووشبوون بە ئەنفلۆنزای باڵندە بپارێزن، دڵنیایی دەدات لەوەی “دۆخەكە ترس و دڵەڕاوكێ ناخوازێت، چونكە تا بەركەوتنی ڕاستەوخۆت لەگەڵ باڵندە و پەلەوەری تووشبوودا نەبێت، تووشی پەتاكە نابیت”.
