ئیلۆن مەسك یەكەم و دووەم تویتی دوای كڕینی تویتەر كرد و جەختدەكاتەوە لەوەی ئازادیی ڕادەربڕین بەردی بناغەی دیموكراسییە و تەنانەت سەرسەختترین نەیارەكانیشی دەتوانن لە تویتەر بن.
دوای كڕینی كۆمپانیای تویتەر، ئیلۆن مەسك یەكەم تویتی بڵاوكردەوە و نووسی، “هیوادارم تەنانەت خراپترین ڕەخنەگرانیشم لە تویتەردا بمێننەوە، چونكە ئازادیی ڕادەربڕین واتە ئەمە”.
دواتر مەسك تویتی دووەمی بڵاوكردەوە و ڕایگەیاند، “ئازادیی ڕادەربڕین بەردی بناغەی دیموكراسییەكی كارایە و تویتەر گۆڕەپانی (سەرەكیی) شاری دیجیتاڵە و تیایدا گفتوگۆ لەبارەی داهاتووی مرۆڤایەتییەوە دەكرێت”.
نووسیویەتی، “دەمەوێت تویتەر باشتربكەم و بەهیوام لەگەڵ كۆمپانیای تویتەر و كۆمەڵگەی بەكارهێنەردا كاربكەم”.
دوێنێ ئیلۆن مەسك ملیاردێری ئەمریكی بووە خاوەنی تویتەر و كۆمپانیاكەی بە بڕی 44 ملیار دۆلار كڕی.
