دیمەنێكی ڤیدیۆیی گەڕانی شێرێك لەگەڵ خاوەنەكەیدا بە ئۆتۆمبێل لە شەقامەكانی بەغدادی پایتەخت كاردانەوەی زۆر لە تۆڕە كۆمەڵایەتییەكاندا بەدوای خۆیدا دەهێنێت.
ڤیدیۆكە لەلایەن هاوڵاتییەكی عێراقییەوە لەكاتی شۆفێریكردندا گیراوە لەكاتێكدا بە ڕێكەوت شێرێك دەبینێت كە لە ئۆتۆمبێلێكی تەنیشتیەوە سەر و دەستەكانتی دەرهێناوە و لەگەڵ گرتنی دیمەنەكەدا بە پێكەنینەوە دەپرسێت “هەواڵ لای عێراقییەكان چۆنە؟”.
بەپێی ڤیدیۆكە، كە بەشێوەیەكی بەرچاو بە تۆڕە كۆمەڵایەتییەكاندا بڵاوبووەتەوە، شیرێك لە كوشنی دواوەی ئۆتۆمبێلێك دەبینرێت كە بە یاوەری خاوەنەكەی بە یەكێك لە شەقامەكانی بەغداد-دا تێپەڕدەبێت و وادەردەكەوێت بە دیمەنەكان سەرسامە.
پاش بڵاوبوونەوەی ڤیدیۆكە، چالاكوانان لە تۆڕە كۆمەڵایەتییەكانەوە ڕەخنەیان لە هەڵسوكەوتی خاوەنەكەی گرت و پێیانوایە ڕیسك كردنە بە گیان و ژیانی ئەوانی دیكەوە.
هەندێكی دیكە هەڵوێستەكەیان بە “گاڵتەجاڕی” ناوبردووە و پرسیار لەبارەی كاردانەوەی بەرپرسان بەرامبەر كاری لەوجۆرە دەكەن.
