وتەبێژی كۆما جڤاكێن كوردستان – كەجەكە ئاشكرایكرد، لە سێ قۆڵەوە شكست بە ئۆپەراسیۆنەكەی توركیا هێنراوە، هۆشداریش دەدات لەوەی ئۆپەراسیۆنەكان بۆ داگیركردنی زیاتری باشووری كوردستانە.
زاگرۆس هیوا، وتەبێژی كۆما جڤاكێن كوردستان – كەجەكە لە لێدوانێكی تایبەت بە تۆڕی میدیایی ئێستا، باسی ئۆپەراسیۆنەكەی توركیا دەكات و دوایین زانیارییەكانی بەرەی جەنگ ئاشكرادەكات.
هیوا لەبارەی ئۆپەراسیۆنەكەوە ئەوەی بیرهێنایەوە، كەجەكە پێشتریش ڕایگەیاندبوو پارتی دیموكراتی كوردستان بەنیازە هاوكاری توركیا بێت لە ئۆپەراسیۆنێكدا، كە لە ناوەڕاستی مانگی نیساندا دژی گەریلا ئەنجامی دەدات. مەبەستی وتەبێژەكەی كەجەكە ڕاگەیەندراوەكەی 26ی مانگی ڕابردوو بوو، كە ئامانجی ئۆپەراسیۆنەكەی ئاشكراكردبوو.
”سەردانەكەی مەسرور بارزانی پەیوەندیی ڕاستەوخۆی بە ئۆپەراسیۆنەكەوە هەبوو”
ئەو دەشڵێت، ئۆپەراسیۆنەكە لە دانیشتنەكەی ئەردۆغان و مەسرور بارزانی-یەوە دەستیپێكرد، لەو ڕۆژەوە تا ئێستا 147 جار هێرشكراوەتە سەر هەرێمەكانی زاپ، مەتینا و ئاڤاشین، لە دوێنێ شەویشەوە تاوەكو ئێستا 100 جار توركیا بۆردومانی هەرێمەكانی گەریلای كردووە.
بۆیە وتەبێژەكەی كەجەكە دوودڵ نییە لەوەی سەردانەكەی مەسرور بارزانی ڕاستەوخۆ پەیوەندیدارە بە ئۆپەراسیۆنەكەوە، دەڵێت، ” مەسرور بارزانی بەڵێنی ئەوەشی بە ئەردۆغان داوە كە بە تەواوەتی هاوكاریان بێت لەو ئۆپەراسیۆنەدا و بەپێی ئەو ئەجێندایانەی كە توركیا دەیەوێت، مامەڵە بكات”.
پارتی چۆن بەشدارە لە ئۆپەراسیۆنەكەدا؟
وتەبێژەكەی كەجەكە شێووازی بەشداریی هێزەكانی پارتی لە ئۆپەراسیۆنەكەدا شیكردەوە، ئاشكرایكرد، “پارتی دیم
وكراتی كوردستان لەم ئۆپەراسیۆنەدا ئاسانكاری و هاوكاریی جووڵەی هێلیكۆپتەرەكانی توركیا دەكات، بەشێوەیەك سەربازی توركیا لە بامەڕنێ و ئامێدی و ناوچەكانی دیكەوە دەگوازنەوە بۆسەر چیای كورەژار، هەروەها پارتی هەوڵدەدات لەو هەرێمانە پەیوەندیی گەریلا لەگەڵ یەكتر داببڕێت، بۆیە گەمارۆی خستووەتە سەر زاپ، مەتینا، حەفتانین و ئاڤاشین”.
لەوەش زیاتر، ئەو شوێنانەی كە هێزی سەربازیی توركیای بۆ دەچێت، پارتی هێزەكانی خۆی جووڵە پێكردووە، بە تایبەت لە شیلادزێ و دێرەلوك هێزی جووڵاندووە تا ڕێگری بكات لە گەریلا و نەتوانن لەسەر زەوی جووڵە بكەن.
ڕوونیشیكردەوە، كپكردنی دەزگاكانی ڕاگەیاندن بەرامبەر بەو ئۆپەراسیۆنە و ڕەویەتیدان بە هێرشەكە لە بواری سیاسیدا، یەكێكی دیكەیە لە هاوكارییەكانی پارتی بۆ توركیا.
”توركیا زیانی بەركەوتووە و لە سێ قۆڵەوە شكستیهێناوە”
زاگرۆس هیوا لەبارەی زیانەكانی توركیا دەڵێت، هەر لەسەرەتای ئۆپەراسیۆنەكەدا توركیا 28 سەربازی لەلایەن گەریلاوە كوژرا و نۆی دیكەشیان برینداربوون، دوو هێلیكۆپتەری توركیاش تێكشكێندراون.
جەختیشی كردەوە، توركیا لە كورەژار و چیای ڕەشە شكستیهێناوە لەوەی پێشڕەوی بكات و سەرباز دابەزێنێت و هێرشی پیادە بكات، گەریلا لەو ناوچانە ڕێگریی لێكردوون، تەنها لە ئاڤاشین توانیویانە دابەزین ئەنجام بدەن.
بەوتەی وتەبێژەكەی كەجەكە، بە گشتی هەر لەئێستاوە سوپای توركیا لە سێ قۆڵەوە شكستی هێناوە.
”جووڵەی هێلیكۆپتەرەكانی توركیا لە خاكی هەرێمەوەیە”
وتەبێژەكەی كەجەكە ئاشكرایدەكات، هێلیكۆپتەرەكانی توركیا كە سەربازەكانی دەگوازێتەوە، هەموویان لە خاكی هەرێمەوە هەڵدەفڕن و لە سنووری توركیاوە نایەنە نێو خاكی هەرێم، بەڵكو لە ناوچەكانی ژێر دەسەڵاتی پارتی لە ئامێدی و بامەڕنێ و شیلادزێوە هەڵدەفڕن”.
زاگرۆس هیوا پێیوایە، ئۆپەراسیۆنەكەی ئەمجارەی توركیا بۆ داگیركاریی زیاترە لەنێو خاكی هەرێمی كوردستاندا، لە ڕووی ئابوری و جوگرافی و سەربازیشەوە دەیەوێت داگیركاریی زیاتر بكات.
پەیامی ئەوەی دا، كە شەڕەكە تەنها شەڕی پەكەكە و توركیا نییە، بەڵكو توركیا دەیەوێت بامەڕنێ و باشیك بكاتە یەك و ئەو هەرێمانە داگیربكات.
