لە مانگی ڕەمەزاندا.. کەی و چۆن وەرزش بکرێت؟

لەگەڵ هاتنی مانگی ڕەمەزاندا، پرسیارەکان لەبارەی وەرزشکردنەوە زیاد دەکەن، سەبارەت بەوەی ئایا کاریگەریی ئەرێنیی هەیە یان نەرێنی، یاخود باشترین کات بۆ ئەنجامدانی کەیە و کام جۆری وەرزش باشترینە؟

وەرزشکردن سوودی زۆری بۆ تەندروستی هەیە، جا لە مانگی ڕەمەزاندا بێت یان نا، بەڵام لە کاتی بەڕوژووبووندا گرنگە ڕادەی چڕی و مەندووکەریی وەرزشەکە و کاتەکەی لەبەرچاوبگیرێت.

ئەگەر وەرزشەکەت چڕ و ماندووکەر بوو، ئەوا باشترە 3 کاتژمێر پاش بەربانگ ئەنجامبدرێت، بەڵام بەر لە ڕۆژووشکاندن باشتر وایە وەرزشی ئاسانتر ئەنجامبدرێت، وەک پیاسەکردن یان ڕاکردنی خاو بە شێوەیەک کە لێدانی دڵ زۆر بەرزنەکاتەوە.

کەی وەرزشی سووک و مامناوەند ئەنجامبدرێن؟

باشتر وایە وەرزشی سووک و مامناوەند نزیکی 40 خولەک بەر لە بەربانگ ئەنجامبدرێت و ماوەکەی 30-40 خولەک بخایەنێت، تاکو ڕاستەوخۆ بکەوێتە پێش ڕۆژووشکاندن و جەستە زۆر وشکنەبێتەوە. وەرزشکردن وزە و ئاوی جەستە بەکاردەبات، بۆیە گونجاو نییە ڕەمەزانان لە سەرەتای ڕۆژەکە، یان لە گەرمادا ئەنجامبدرێت.

کام وەرزش ئەنجامبدرێت؟

لە کاتی بەڕوژووبووندا، وەرزشە مامناوەندەکانی وەک پیاسەکردن و ڕاکردنی خاو و مەلە گونجاوترن، واتە ئەو وەرزشانەی بە کاردیۆ ناسراون، نەک وەرزشەکانی بەرهەڵستیی ماسوولکەیی و هەڵگرتنی قورسایی، چونکە ئەو جۆرەیان وزەی جەستە بەتەواوی بەکاردەبات، بۆیە باشترە بخرێتە پاش ڕوژووشکاندنەوە، لایەنی کەم بە ماودای 3 کاتژمێر.

چەند ڕێنماییەکی گشتی

پێش بەربانگ یان دوای بەربانگت بۆ وەرزشکردن هەڵبژارد، چەند ڕێنماییەک هەن سەبارەت بە وەرزش و بەڕوژووبوون کە دەکرێت لە هەموو بارەکاندا سوودیان هەبێت.

خواردنەوەی ئاوی زۆر، تاکو جەستەت وشک نەبێتەوە و قەرەبووی وشکبوونەوەی ڕۆژەکە بکەیتەوە.

خۆشەکەتنەکردن، واتە خۆبەدوورگرتن لە وەرزشە زۆر سەخت و ماندووکەرەکان.

ڕاوەستان لە کاتی پێویستیدا، واتە ئەگەر هەستت بە شەکەتی، ئازار، سەرئێشە یان خێرابوونی زۆری لێدانەکانی دڵت کرد، پێویستە وەرزشەکەت ڕابگریت و پشووبدەیت.

خۆبەدوورگرتن لە کافین، واتە نەخواردنەوەی قاوە و چا و خواردنەوە گازییەکان، چونکە کافینیان تێدایە و ئەو مادەیەش جەستە وشکدەکاتەوە.