ڕێکخراوی تەندروستیی جیهانی دڵنیایی دەدات لەبارەی نەخۆشیی ئاوڵەی مەیمون و ڕایگەیاندووە، نەخۆشییەکە لە ئێستادا مەترسیی نییە بۆئەوەی بگۆڕێت بە پەتایەکی جیهانی لەدەرەوەی کیشوەری ئەفریقا.
ڕۆزامۆند لویس، گەورە پسپۆڕی بواری ئاوڵەی مەیمون لە ڕێکخراوی تەندروستیی جیهانی ڕایگەیاند، “لەئێستادا نیگەران نین لە گۆڕانی ئاوڵەی مەیمون بۆ پەتایەکی جیهانی، تائێستا دەتوانین ڕێگری لە بڵاوبوونەوەی پەتاکە بکەین”.
دوای ئەوەی لە 7ی ئایار بەریتانیا یەکەم تووشبووی ئاوڵەی مەیمونی ڕاگەیاند، تائێستا ڕێکخراوی تەندروستیی جیهانی نزیکەی 400 حاڵەتی نەخۆشییەکەی لە 20 وڵاتی جیهان پشتڕاستکردووەتەوە.
بەپێی ڕێکخراوی تەندروستیی جیهانی نەخۆشیی ئاوڵەی مەیمون نەخۆشییەکی ڤایرۆسیی ئاژەڵیی دەگمەنە، کە لە ئاژەڵەوە دەگوازرێتەوە بۆ مرۆڤ، تائێستا هیچ چارەسەر یان ڤاکسینێکی تایبەت بە نەخۆشییەکە بوونی نییە.
نەخۆشییەکە بۆ یەکەمجار لە ساڵی 1970 لە کۆماری کۆنگۆ دۆزرایەوە، تائێستاش زۆرینەی حاڵەتەکان لە کۆماری کۆنگۆ و ڕۆژئاوای ئەفریقا تۆماردەکرێن.
