ئه‌مشه‌و، سێشه‌ممه ڕوبه‌ڕوبوونه‌وه ئاگرینه‌کانی هه‌فته‌ی شه‌شه‌می خولی نه‌ته‌وه‌کانی ئه‌وروپا ئه‌نجامدران، هه‌ڵبژارده‌ی ئیسپانیا به ئه‌نجامێکی مێژوویی له ئه‌ڵمانیای برده‌وه.
له سه‌ره‌تاکانی تایمی یه‌که‌مدا ئه‌ستێره‌کانی دای مانشافت باشتر ده‌رکه‌وتن و توانیان کۆنتڕۆڵی ناوه‌ندی یاریگا بکه‌ن، به‌ڵام له‌گه‌ڵ تێپه‌ڕبوونی کات هه‌موو شتێک پێچه‌وانه‌بووه‌وه.
ئه‌لڤارۆ مۆراتا له خوله‌کی 17 گۆڵی یه‌که‌م و پێشه‌نگی ماتادۆره‌کانی له یاریگای لاکارتۆخا تۆمارکرد، له‌دوای ئه‌م گۆڵه دوو گۆڵی دیکه هه‌ر له‌و تایمه‌دا و له خوله‌که‌کانی 33 و 38 له‌لایه‌ن فیران تۆرێس و ڕۆدریگۆ هێرناندێزه‌وه تۆمارکران.
سه‌ره‌ڕای ئه‌وه‌ی ئه‌نجامه‌که سێ گۆڵی بێوه‌ڵام بوو و لویس ئینریکی توانیبووی ئه‌نجامه‌که یه‌کلاییبکاته‌وه، به‌ڵام له‌هه‌مان کاتدا چاوه‌ڕوانی کاردانه‌وه‌ی مه‌کینه ئه‌ڵمانییه‌کان ده‌کرا و ئه‌وه‌ی ڕوویدا دووباره‌بوونه‌وه‌ی سیناریۆکانی تایمی یه‌که‌م بوو.
له خوله‌که‌کانی 55 و 71 و 88 فیران تۆرێس (دوو گۆڵ) و ئۆیارزابال سێ گۆڵی دیکه‌ی بۆ ئیسپانیای خانه‌خوێ تۆمارکرد و به‌ته‌واوی مه‌کینه‌کانی ئه‌ڵمانیای تێکشکاند و ئه‌نجامه‌که‌ی بۆ شه‌ش گۆڵی بێوه‌ڵام به‌رزکرده‌وه، یارییه‌که‌ش هه‌ر به‌و ئه‌نجامه کۆتاییهات.
به‌پێی ئه‌نجامه تۆمارکراوه‌که، لارۆخا ژماره‌ی خاڵه‌کانی گه‌یانده 11 و لوتکه‌ی کۆمه‌ڵه‌که و بلیتی قۆناغه یه‌کلاکه‌ره‌وه‌کانی مسۆگه‌رکرد، ئه‌ڵمانیاش به نۆ خاڵه‌وه له پله‌ی دووه‌مدا جێگیربوو.
ئه‌نجامه تۆمارکراوه‌کانی ئه‌مشه‌و:
ئه‌ندۆرا 0 – 5 لاتیڤیا
ماڵته 1 – 1 فارو ئایسلاند
کرواتیا 2 – 3 پۆرتوگال
فه‌ره‌نسا 4 – 2 سوید
ئیسپانیا 6 – 0 ئه‌ڵمانیا
مۆنتینیگرۆ 4 – 0 قوبرس
لۆکسیمبۆرگ 0 – 0 ئازه‌ربایجان
گیبراڵتار 1 – 1 لیشتنشتاین
