کۆنگرەی نەتەوەیی کوردستان پەیامێکی بۆ 34هەمین ساڵیادی کیمیابارانی هەڵەبجە بڵاوکردەوە، داوای بەجینۆسایدناساندنی تاوانەكە دەكات، دەشڵێت، “تائێستاش لە باشووری کوردستان چەکی کیمیایی لەلایەن دەوڵەتی تورکەوە دژ بە خەڵکی مەدەنیی و شەڕڤانانی ئازادیی بەکاردەهێندرێت”.
کۆنگرەی نەتەوەیی کوردستان-کەنەکە لە پەیامەكەیدا دەڵێت، “کۆمەڵکوژیی دڕندانەی هەڵەبجە هێشتا لە مێشک و ڕۆحی گەلی کورددا زیندووە و لەبیرنەکراوە و هیچ کاتێکیش لەبیرناکرێت، هەروەها لەم مانگەدا چەندین کۆمەڵکوژیی هاوشێوەی هەڵەبجە لەلایەن دەوڵەتە داگیرکەر و فاشیستەکانەوە دژ بە گەلی کورد ئەنجامدراون”.
کەنەکە بەكارهێنانی چەكی كیمیایی لەلایەن دەوڵەتی توركیاوە دژ بە گەریلاكانی پەكەكە لە باشووری كوردستان بەبیردەهێنێتەوە، ڕایگەیاندووە، “کۆمەڵکوژیی لەوشێوەیە تەنها لەلایەن ڕژێمی فاشیستی سەدامەوە ئەنجامنەدراوە، دەوڵەتی تورکیش لە مێژووی سەدەی ڕابردووی خۆیدا چەندین جار بە چەکی کیمیایی کۆمەڵکوژیی لەوشێوەیەی ئەنجامداوە و هەتا ئێستاش بەردەوامە لە بەکارهێنانی چەکی کیمیایی بەرامبەر گەلی کورد و هاوڵاتیی مەدەنی، بەتایبەت لە دوو ساڵی ڕابردوودا دەیان جار دەوڵەتی تورک چەکی کیمیایی لە باشووری کوردستان دژی شەڕڤانانی ئازادیی و خەڵکی مەدەنیی بەکارهێناوە و هەتا ئێستاش بەردەوامە لە بەکارهێنانی”.
کەنەکە بەپێویستی دەزانێت کۆمەڵکوژیی هەڵەبجە بەبیر جیهان بهێندرێتەوە، جەختدەکاتەوە، پێویستە نەتەوە یەکگرتووەکان و یەکێتیی ئەوروپا و دادگای نێودەوڵەتی کەیسی هەڵەبجە بە جینۆساید بناسێنن.
