قائیمقامی سامەڕا و تۆمەتبارێكی تر كە خۆی وەك كاربەدەست ناساندبوو و پارەی لە خەڵك وەرگرتبوو، دادگاییكران و یەكەمیان بە حەوت ساڵ و دووەمیش بە 10 ساڵ زیندانیكردن سزادران.
بەپێی ڕاگەیەندراوێكی ئەنجومەنی باڵای دادوەریی عێراق كە ئەمڕۆ چوارشەممە بڵاویكردووەتەوە، مەحموود خەڵەف ئەحمەد قائیمقامی قەزای سامەڕا تۆمەتباربوو بە بردنی پارە لە ئەژماری پارێزگای سەڵاحەدین و بەكارهێنانی بۆ بەرژەوەندیی خۆی.
ئاشكرایكرد، دادگای تاوانەكانی سەڵاحەدین قائیمقامی سامەڕای دادگاییكردووە و تۆمەتەكەی بەسەردا ساغبووەتەوە و سزای حەوت ساڵ زیندانیكردنی بەسەردا سەپێندراوە.
لە ڕاگەیەندراوێكی تردا ئەنجومەنی باڵای دادوەریی عێراق ئاشكرایكرد، تۆمەتبارێك سزادراوە كە پۆستی بەڕێوەبەری نووسینگەی سەرۆكی ئەنجومەنی باڵای دادوەریی عێراقی بەكارهێناوە و خۆی وەك ئەو كاربەدەستە ناساندووە.
ڕاگەیەندراوەكە دەڵێت، تۆمەتبارەكە لای هاوڵاتییان خۆی بە بەڕێوەبەری نووسینگەی سەرۆكی ئەنجومەنی باڵای دادوەری ناساندووە و مامەڵەی لەگەڵداكردوون و پارەی لێسەندوون، بەو هۆیەوە دادگای تاوانەكانی كەرخ سزای 10 ساڵ زیندانیكردنی بەسەردا سەپاندووە.
