ئەمڕۆ 8ی مارس، ڕۆژی جیهانیی ژنانە، بەپێی ئامارەكانی لیژنەی تایبەتمەندی پەرلەمانی كوردستان، لە سەرەتای ئەمساڵەوە 15 ژن کوژراون، بەو مانایەی بە 67 ڕۆژ، 15 ژن كوژراون.
لە لێدوانێکدا بۆ تۆڕی میدیایی ئێستا، شادی نەوزاد جێگری سەرۆکی لیژنەی داکۆکیکردن لە مافەکانی ئافرەتان لە پەرلەمانی كوردستان ڕایگەیاند، “لەمساڵدا 15 ژن کوژراون، کە ڕێژەکە بەراورد بە نزیكەی دوو مانگی ساڵی ڕابردوو بەرزە و توندوتیژی و کوشتنی ژنان زیادیکردووە”.
ئەمە سەرەڕای ئەوەی جێگری سەرۆکی لیژنەی داکۆکیکردن لە مافی ئافرەتان پێیوایە ”دادگاکان ڕۆڵیان باش نییە لە یەکلاییکردنەوەی دۆسیەکانی ژناندا، ڕێکارەکان بۆ یەکلاییکردنەوەی دۆسیەیەک زۆرن و کاتێکی زۆری دەوێت”، بۆیە پەرلەمانتارەكە ئەوە بە گرفت دەزانێت.
هەر لەو بارەیەوە، سەرکەوت عومەر بەڕێوەبەری گشتیی توندوتیژیی خێزانی لە سلێمانی بە تۆڕی میدیایی ئێستای وت، “لەمساڵدا تا ئێستا لە سنووری پارێزگای سلێمانی دوو حاڵەتی کوشتنی ژنان هەبوون، لەكاتێكدا ساڵی 2021 لە سنووری سلێمانی 10 ژن کوژراون”.
ئاماژەی بەوە کرد، بەراوردکردن لەنێوان ئەمساڵ و ساڵی ڕابردوودا ئێستا ناکرێت، بەهۆی ئەوەی تەنها دوو مانگی ساڵی نوێ تێپەڕیوە.
ئەو بەرپرسەی توندوتیژیی خێزانی لە سلێمانی پرسەكەشی بەستەوە بە خراپیی دۆخی ئابوری و کۆمەڵایەتی لە هەرێمی كوردستان و “ڕووداوەکانی بە زۆر دانەنا”، “هەرچەندە کوشتنی یەک ژنیش لای ئێمە ژمارەیەکی زۆرە”، عەمید سەرکەوت وای وت.
پێشیوایە، ئەو هەوڵانەی لە بەڕێوەبەرایەتییەکانی بەرەنگاربوونەوەی توندوتیژییەوە دەدرێن، ڕۆڵی زۆریان هەبووە لە کەمکردنەوەی توندوتیژییەکان بەرامبەر ژنان.
بەپێی دوایین ئامارەکانی بەردەستی نەتەوە یەکگرتووەکان، لە جیهاندا، بە لایەنی کەم ژنێک لە هەر 3 ژنێکی تەمەن 15 ساڵ و گەورەتر، یەکجار لە تەمەنیاندا تووشی توندوتیژیی جەستەیی یان سێکسی بوون، ئاماژە بەوەش دەکات کە ئاستی توندوتیژیی دژ بە ژنان و کچان لە ماوەی دەیەی ڕابردوودا بە نەگۆڕیی ماوەتەوە.
