لە سلێمانی و گەرمیان بایكۆتی ناوەندەكانی خوێندن فراوانتر دەبێت، نزیكەی نیوەی خوێندنگەكانی كەلار دەوام ناكەن، لە سلێمانیش بایكۆتەكە فراوانترە.
لە دوێنێوە بایكۆتی بەشێك لە دامەزراوەكان لە سنوورەكانی سلێمانی و هەڵەبجە و گەرمیان و ڕاپەڕین دەستیپێكرد، ئەمڕۆ بایكۆتەكە فراوانتر بوو و فەرمانبەر و فەرمانگە و خوێندنگەی زیاتری گرتەوە.
لە سلێمانی، جگە لە بەشێكی زۆری فەرمانگەكان، لە ناوەندەكانی خوێندنیش بایكۆتی فراوان دەستیپێكردووە، لەكاتێكدا تاقیكردنەوەكانی نووسینەكیی وەرزی دووەم دەستیپێكردووە و پێدەچێت كاریگەریی لەسەر دروستببێت.
هەر ئەمڕۆ لە شاری كەلاری ناوەندی ئیدارەی گەرمیان بەشێكی زۆری ناوەندەكانی خوێندن دەوامیان نەكرد و مامۆستایان بایكۆتیان كرد، وەك كاردانەوەیەك بەرامبەر بە دواكەوتنی دابەشكردنی مووچەكانیان.
ئارام ڕەحیم، بەڕێوەبەری ڕاگەیاندنی پەروەردەی گەرمیان بە تۆڕی میدیایی ئێستای ڕاگەیاند، لانی كەم نیوەی ناوەندەكانی خوێندن بایكۆتی دەوامیان كردووە.
لە سەرەتای ئەم هەفتەیەوە تاقیكردنەوەكانی نووسینەكیی وەرزی دووەم لە ناوەندەكانی خوێندن دەستیانپێكردووە، دیارنییە بەهۆی بایكۆتەوە چارەنووسی تاقیكردنەوەكان بەچی دەگات.
