بەهۆی بۆردومانی ڕوسیاوە، ئاگر لە بنكەیەكی ئەتۆمیی ئۆكرانیا كەوتەوە، كە گەورەترینە لە ئەوروپا، تا ئێستا هیچ قسەیەك نییە لەبارەی ئەگەری دروستبوونی تیشكدانەوەی ئەتۆمی.
بەرەبەیانی ئەمڕۆ دەەسەڵاتدارانی ئۆكرانیا ڕایانگەیاند، بۆردومانێكی ڕوسی وێستگەی ئەتۆمیی “زاپۆریژیا”ی كردووەتە ئامانج و بەهۆیەوە ئاگر لە باڵەخانەی تایبەت بە ڕاهێنان و تاقیگەی وێستگەكە كەوتووەتەوە.
ئەم بەیانییە دەزگای حاڵەتە لەناكاوەكانی ئۆكرانیا ڕاگەیەندراوێكی لە تۆڕی كۆمەڵایەتیی فەیسبووك بڵاوكردەوە، نزیكەی كاتژمێر 04:20 خولەك بە كاتی گرینج ( 6:20 خولەك بە كاتی هەرێمی كوردستان) ئاگرەكە كۆنترۆڵكراوە و هیچ قوربانییەك نەكەوتووەتەوە.
لای خۆیەوە ئاژانسی نێودەوڵەتیی وزەی ئەتۆم ئاشكرایكرد، ئۆكرانیا هیچ گۆڕانكارییەكی لە ئاستی تیشكدانەوەی ئەتۆمی لە بنكەكە تۆمارنەكردووە.
