وەزارەتی دارایی هەرێم ڕایدەگەیەنێت، تائێستا هیچ بڕیارێك سەبارەت بە لێبڕینی مووچەی فەرمانبەران نەدراوە، هەر جۆرە قسەیەكیش لەوبارەیەوە بە ”دەنگۆ” وەسفدەكات، هۆكاری دواكەوتنی دابەشكردنی مووچەی ئەم مانگەش ئاشكرادەكرێـت.
بەگوێرەی ئەو زانیارییانەی لە سەرچاوەیەكی تایبەت لە وەزارەتی دارایی و ئابوریی هەرێمی كوردستانەوە بە تۆڕی میدیایی ئێستا دراون، هیچ بڕیارێك بۆ پەیڕەوكردنی لێبڕین لە مووچەی مانگی شوباتی فەرمانبەران لە ئێستادا نەدراوە و ئەوەی باسدەكرێت كە گوایە لێبڕینی مووچە دەستپێدەكاتەوە، تەنها دەنگۆیەكە، لە وەزارەتی دارایی و ئابوری باس لەو بابەتە نەكراوە.
لەبارەی دواكەوتنی مووچەی ئەم مانگە، بەپێی زانیارییەكانی سەرچاوەكەی وەزارەتی دارایی، داهاتی نەوتی فرۆشراوی هەرێمی كوردستان مانگانە لە توركیاوە دەگەڕێتەوە بۆ وەزارەتی دارایی و ئابوری، زۆركات بەهۆی چەند گرفتێكی تەكنیكی و ئاڵوگۆڕی دۆلار بۆ دینار، دوادەكەوێت ئەمەش وادەكات دابەشكردنی مووچە دوابكەوێت.
هۆكارێكی دیكەی دواكەوتنی مووچەی ئەم مانگە، وەك ئەوەی سەرچاوەكە باسیكرد، پەیوەندیی بەوەوە هەیە، لە بەشێكی داهاتی نەوتیی مانگی شوبات مووچەی مانگی یەكی ئەمساڵی چەند وەزارەتێك و خانەنشینانی مەدەنی و سەربازی خەرجكرا، كە دابەشكردنی مووچەكانیان دەكەوێتە كۆتاییەوە.
دواكەوتنی مووچەی ئەم مانگە هاوكاتە لەگەڵ ئەوەی بۆ دووەم مانگە لەسەریەك بەغداد 200 ملیار دینارەكەی بۆ هەرێمی كوردستان نەناردووە، پێشتر ئێستا ئاشكرایكردبوو، لە بەغداد سكاڵا لە دژی ناردنی پارەكە تۆماركراوە، بۆیە ڕاگیراوە.
