سەرچاوەیەكی ئاگادار دەرئەنجامی كۆبوونەوەكەی ئەمرۆی نێوان ڕوسیا و ئۆكرانیای ئاشكراكرد و ڕایگەیاند هەردوولا ڕێككەوتون درێژە بە دانوستانەكانیان بدەن.
میخائیل بودولاك، ڕاوێژكاری نوسینگەی سەرۆكی ئۆكرانیا ڕایگەیاند، ڕوسیا و ئۆكرانیا هاوڕابوون لەسەر بەردەوامیدان بە دانوستانەكان كەدەبێت شەڕ لە ئۆكرانیا ڕابگیرێت و كێشەكانی نێوانیان چارەسەربكرێت.
ڕاوێژكارەكەی سەرۆكی ئۆكرانیا ئاشكرایكرد، هەردوولا گفتوگۆیان كردووە و ڕێككەوتوون كە جارێكی دیكە كۆببنەوە ئەو كێشانەی لەنێوانیاندا هەیە چارەسەری بكەن.
هاوكات ڤلادیمێر میدینسكی، یاریدەدەری سەرۆكی ڕوسیا ڕایگەیاند، كۆبوونەوە و دانوستانەكانی ئەمرۆی نێوان شاندی ڕوسیا و ئۆكرانیا ماوەی پێنج كاتژمێری خایاندووە ئەو خاڵانەی لەكۆبوونەوەكە باسی لێوەكراوە ئاماژەیەكی ئەرێنییە بۆ گەیشتن بە هەڵویست و بڕیارێكی هاوبەش.
یاریدەدەری سەرۆكی ڕوسیا ئاماژەی بەوەشكرد ئەنجامی دانوستانەكان دەكرێتە ڕاپۆرتێك و بەرزدەكرێتەوە بۆ هەردوو سەرۆكی ڕوسیا و ئۆكرانیا.
