لەگەڵ ئەوەی نزیکەی سێ مانگە مووچەی مامۆستایان و فەرمانبەران دابەشنەکراوە مەسرور بارزانی لە دەسپێکی ساڵی نوێی خوێندن و بایکۆتی مامۆستایان داوا دەکات خۆڕاگربن.
مەسرور بارزانی سەرۆکی حکومەتی هەرێمی کوردستان لە وتارێکدا بەبۆنەی دەستپێکردنی ساڵی نوێی خوێندن لە یەکێک لە خوێندنگە تایبەتەکان و بایکۆتی مامۆستایان رایگەیاند، دەزانێت کە مامۆستایان لە رووی مادییەوە تووشی گرفت بوون، بەڵام پێویستە خۆڕاگربن.
ئەوەش لەکاتێکدایە، کابینەکەی مەسرور بارزانی تا ئێسا نەیتوانیوە مووچەی مانگی حەوتی مامۆستایان و فەرمانبەرانی هەرێمی کوردستان دابەشبکات، لە کاتێکدا لە مانگی 10 نزیک دەبینەوە، پێشتریش محەمەد شیاع سودانی سەرۆک وەزیرانی عێراق تەئکیدی لەوە کردەوە کە حکومەتی هەرێم پابەندی یاسای بودجە نییە.
هاوکات ئەمڕۆ زەنگی ساڵی نوێی خوێندن لە هەرێمی کوردستان لێدرا، بەڵام بەهۆی دابەشنەکردن و پێنەدانی مووچەکانیان بەشێك لە مامۆستایان بایکۆتی دەوامیان کردووە
