بۆ چوارەم ڕۆژە خۆپیشاندانی دەربڕینی ناڕەزایی لە ڕوسیا دەكرێت و هەزاران خۆپیشاندەر دژی هێرشەكانی سوپای وڵاتەكەیانن بۆسەر ئۆكرانیا.
لە خۆپیشاندانەكانی ئەمڕۆدا كە تا ئێستا لە مۆسكۆ و سەینت پێترسبۆرگ بەردەوامن، خۆپیشاندەران دروشمی دژبەریی جەنگیان بەرزكردووەتەوە و هاوخەمی بۆ گەلی ئۆكرانیا دەردەبڕن و داوای خۆڕاگری و بەهێزیی لێدەكەن.
خۆپیشاندەران لە دروشمەكانیاندا دژایەتیی خۆیان بۆ شەڕ دەردەبڕن و داوا لە حكومەتی وڵاتەكەیان دەكەن جەنگ ڕابگرێت، بەشێكیان داوای لێبوردن لە گەلی ئۆكرانیا دەكەن و لەسەر لافیتە و كاغەز نووسیویانە: “ببورن كە من ڕوسیم”.
هێزە ئەمنییەكانی ڕوسیا لە ناوەندی مۆسكۆی پایتەخت و شاری سەینت پێترسبۆرگ بڵاوبوونەوە و ژمارەیەك خۆپیشاندەریان دەستگیركردووە.
هاوكاتی ڕوسیا، لە ئەڵمانیا خۆپیشاندان دژی هێرشی ڕوسیا بۆسەر ئۆكرانیا بەڕێوەدەچێت. پێشتریش لە ئەسینای پایتەختی یۆنان و ڕۆمای پایتەختی ئیتاڵیا و بۆسنە و سلۆڤینیا و ئەرجەنتین خۆپیشاندان بۆ دەربڕینی ناڕەزایی بەرامبەر هێرشی ڕوسیا بۆسەر ئۆكرانیا ئەنجامدراون. خۆپیشاندەران پوتین بە “هیتلەر” و “بكوژ” ناوزەددەكەن و داوای ڕاگرتنی شەڕ و بەرپاكردنی ئاشتی دەكەن.
