بەهۆی داڕمانی خاکەوە لە دوورگەی سولاوەسی ئیندۆنیزیا ژمارەیەک هاوڵاتیی وڵاتەکە گیانیان لەدەستدا و گەڕان بەدوای بێسەروشوێنبوواندا بەردەوامی هەیە و تا ئێستا تەرمی 18 کەس دۆزراوەتەوە.
رووداوەکە لە سنووری گوندێکی دوورگەی سولاوەسی روویداوە بەناوی تانا تۆراجا کە شوێنێکی گەشتیارییە و ژمارەیەکی زۆری گەشتیار ساڵانە رووی لێدەکەن بەهۆی سەرنجڕاکێشی ناوچەکەوە.
تیمەکانی گەڕان و پشکنین باسیان لەوەکردووە بەردەوامن لە کارەکانیان بۆ دۆزینەوەی دوو کەسی دیکە کە بێسەروشوێنن و کارمەندانی هێزە ئەمنییەکان و بەشێک لە هاوڵاتییان لەگەڵیان بەشێوەی خۆبەخش بەشدارن لە گەڕانەکاندا.
تانا تۆراجا و ناوچەکانی دەوروبەری لەماوەی دوو هەفتەی رابردوودا بارانبارینی بەخوڕی بەخۆیەوە بینیوە بووە و ئەوەش هۆکاری داڕمانی خاکی ناوچەکە بووە.
