بەهۆی زۆربوونی ژمارەی تووشبووانی کۆرۆنا، بەتایبەت لەدوای بڵاوبوونەوەی گۆڕاوی ئۆمیکرۆن و خواستی زۆری بەکارهێنانی ئازارشکێنە بەناوبانگەکەی بواری پزیشکی “Paracetamol”، بەڵام توێژینەوەیەکی نوێی بەریتانی هۆشداری دەدات لەوەی زۆر بەكارهێنانی ئەو حەبە، مەترسییەکانی تووشبوون بە جەڵتەی دڵ و مێشك زیاتر دەكات.
پاراسیتامۆڵ، ئازارشکێنێکی بەناوبانگە، بەڵام ئێستا لەلایەن تووشبووانی کۆرۆناوە بۆ کەمکردنەوەی ئازار و دابەزاندنی پلەی گەرمیی جەستە بەڕێژەیەکی زۆر بەکاردەهێنرێت، ئەوەش بەپێی توێژینەوەكە، مەترسیی تووشبوون بە جەڵتەی دڵ زیاددەکات.
توێژەرانی سکۆتلەندا تویژینەوەیەکیان ئەنجامداوە، ئاماژە بەوەدەکەن، بەکارهێنانی پاراسیتامۆڵ بەشێوەیەکی بەردەوام لەلایەن بەریتانییەکانەوە مەترسیی تووشبوون بە جەڵتەی دڵی لای چوار یەکی بەریتانییەکان زیادکردووە.
لەگەڵ ئەوەشدا توێژینەوەکە هۆشداری دەداتە ئەو کەسانەی فشاری خوێنیان هەیە، لە بەکارهێنانی بەردەوامی ئەو حەبە دووربکەونەوە، چونکە دەکرێت بۆیان ببێتە هۆکاری هەواڵی خراپ.
هۆشدارییە سەرەكییەكە ئەوەیە، كە بەکارهێنانی ڕۆژانەی دوو حەبی پاراسیتامۆڵ، تووشبوون بە جەڵتەی دڵ و مێشک بەڕێژەی 20% زیاتر دەکات.
توێژەران سوورن لەسەر ئەوەی پێویستە پزیشکان کەمترین ژەمی ئەو ئازارشکێنە بۆ نەخۆشەکانیان دیاریبکەن لە حاڵەتی پێویستبوونیان بۆ کەمکردنەوەی ئازار.
دکتۆر ڕایان ماکنتایەر، کە پزیشکێکی سکۆتلەندییە لەوبارەیەوە دەڵت، “مەترسییەكان ئەو کەسانە ناگرێتەوە، کە بۆ سەرئێشە یان تا، حەبەکە ماوە ماوە بەکاردەهێنن، ئەوە کارێکی باشە و سوودبەخشە، بەڵام بەکارهێنانی بەردەوام بۆ کەمکردنەوەی ئازار لەلایەن ئەوانەی ئازاری درێژخایەنیان هەیە، کارێکی مەترسیدارە”.
توێژینەوەکە لە گۆڤاری Circulationـەوە بڵاوکراوەتەوە و تێیدا 110 نەخۆش بەشدارییانکردووە، لەناو سەرجەمیاندا بەشێوەیەکی بەرچاو کێشەی بەرزبوونەوەی فشاری خوێن دروستبووە، بەپێی توێژینەوەکە لەگەڵ ئەوەی بەشێکی زۆریان بەشێوەیەکی زۆر بەرز فشاری خوێنیان بەرزدەبووەوە، بەڵام لەگەڵ ڕاگرتنی بەکارهێنانی حەبەکەدا فشاری خوێنیان بەخێرایی دەهاتە خوارەوە.
پرۆفیسۆر جەیمس دێر لەوبارەیەوە دەڵێت، لەگەڵ ئەوەی پاراسیتامۆڵ زۆرترین بەکارهێنانی هەیە لە جیهاندا، بەڵام توێژینەوەکە بەڕوونی دەریدەخات، هۆکارە بۆ بەرزبوونەوەی فشاری خوێن، کە یەکێکە لە پاڵنەرە سەرەکییەکانی تووشبوون بە جەڵتەی دڵ و مێشک.
