قائیمقامیەتی سلێمانی ڕەتیدەکاتەوە هیچ هەوڵێک هەبێت بۆ کردنی باخی گشتی بە پرۆژەی بازرگانی و پێشتریش شارەوانیی سلێمانی بەهەمان شێوە ئەو دەنگۆیانەی ڕەتکردبووەوە.
لە ڕاگەیەندراوێکدا قائیمقامییەتی سلێمانی ئاشکرایکرد، بەھیچ شێوەیەک ھیچ ھەوڵێکی لەوشێوەیە لە ئارادانییە، ڕێگەش بەوەنادرێت ئەم شوێنە گرنگ و مێژوویەی شار بکرێتە ئامانج یان زیانی پێبگەیەندرێت.
قائیمقامییەتی سلێمانی نیگەرانیی خۆی لە بڵاوکردنەوەی ئەو جۆرە دەنگۆیانە پیشاندا.
لە راگەیەندراوەکەدا هاتووە، “باخی گشتیی سلێمانی کە لە ساڵی 1937 دروستکراوە دێرینترین و گرنگترین باخەکانی ئەم شارەیە، بەشێکی گرێدراوە لەگەڵ مێژووی شارستانیی سلێمانی و یادەوەریی خەڵکەکەی، لەبەر دەیان ھۆکاری دیکە ڕێگەنادرێت ئەم سیما جوان و دیارەی شار لە ناوببرێت یان زیانی پێ بگەیەندرێت”.
ڕاشیگەیاندووە، لێرەوە بە رای گشتی و ھەموو لایەکی رادەگەیەنین باخی گشتی و سەرجەم شوێنە گرنگ و مێژووییەکانی سلێمانی وەک ناسنامەی سلێمانی و خەڵکەکەی ھەر بە پارێزراوی دەمێنێتەوە.
