ئەنجامە سەرەتاییەکانی توێژینەوەیەکی ئەمریکی دەریانخستووە، دەرمانێکی چارەسەری شێرپەنجە کە بەرهەمی کۆمپانیای “مێرک”ــە، ڤایرۆسی HIV دەکاتە ئامانج، کە هۆکاری تووشبوونە بە نەخۆشیی ئایدز.
توێژەران لە توێژینەوەکانیاندا دەرزیی “Keytruda”ی تایبەت بە چارەسەری تووشبووانی شێرپەنجەیان بەکارهێناوە بۆ ئەوانەی تووشبووی ڤایرۆسی HIV بوون و لەهەمانکاتدا تووشبووی شێرپەنجە بوون، ئەنجامە سەرەتاییەکانی توێژینەوەکان دەریانخستووە چارەسەرەکە دەبێتە هۆی لەناوبردنی ڤایرۆسی ئایدز لە خانەکانی بەرگریی جەستە.
زانایان ئاماژە بەوەدەکەن، ئەم ئەنجامانە هەرچەندە سەرەتایین، بەڵام پاڵنەرێکن بۆ توێژینەوەی زیاتر و بەکارهێنانی دەرزییەکە وەک چارەسەرێکی درێژخایەنی نەخۆشیی ئایدز.
بەکارهێنانی زۆرێک لە دەرمانە دژەڤایرۆسەکان بۆ تووشبووانی ئایدز، دەکرێت هەلی ماوەیەکی زیاتری ژیانیان پێبدات، بەڵام ئەو دەرمانانە نەیانتوانیوە ڤایرۆسەکە بەهەمیشەیی لەخانەکاندا لەناوببەن، مانەوەی ڤایرۆسەکەش بەمانای ئەوە دێت کە هێشتا نەخۆشییەکە چارەسەرنەکراوە.
تیمێک لە توێژەرانی نێودەوڵەتی دەڵێن، گەیشتوونەتە بەڵگەی ئەوەی دەرزی “Keytruda” دەتوانێت خانەکە لە ڤایرۆسی HIV دەربازبکات، هەروەها ئەو خانانەشی تووشنەبوون لە هەر دزەکردنێکی ڤایرۆسەکە دەیانپارێزێت.
32 کەسی تووشبوو بە شێرپەنجە و ڤایرۆسی HIV لە توێژینەوەكەدا بەشداربوون، لەگەڵ بەکارهێنانی ئەو دەرزییەدا تووشبووەکان چارەسەرەکانی دیکەی نەخۆشیی ئایدزیان بۆ بەکارهێنراوە.
شارلۆن لیۆن یەکێک لە سەرپەرشتیارانی توێژینەوەکە دەڵێت، بەردەوامدەبین لەتوێژینەوە لەسەر ئەو سامپڵانەی هەمانە، تاوەکو تێبگەین لە ئاستی وەڵامدانەوەی بەرگریی جەستەیان دژی ڤایرۆسی HIV.
