لیژنەیەکی باڵا لە وەزارەتی تەندروستیی عێراق و هەرێمی کوردستان بەمەبەستی بەدواداچوون لە بڵاوبوونەوەی نەخۆشیی هەوکردنی پەردەی مێشکی منداڵان سەردانی سلێمانی و هەڵەبجەی کرد، لیژنەکە جەختدەکاتەوە نەخۆشییەکە مەترسیدار نییە و ئەگەری زۆرە ڤایرۆسی بێت.
لە کۆنگرەیەکی رۆژنامەوانیدا لیژنەکە رایگەیاند، سەردانی هەڵەبجە و سلێمانیمان کردووە ئەوەی بەدواداچوونمان کردووە و حاڵەتی قورسمان نەبینیوە و زۆرینەی حاڵەتەکان سوکن، بۆیە بە ئەگەری زۆر نەخۆشییەکە ڤایرۆسییە نەک بەکتریا.
باسی لەوەکرد، مەترسیی ئەوان لەوەیە کە هۆکاری نەخۆشییەکە بەکتریابێت کە زۆر مەترسیدارە و لە ماوەی 24 کاتژمێردا مردنی لێدەکەوێتەوە، بەڵام ئەوەی تا ئێستا لەبەردەستدایە هۆکارەکەی ڤایرۆسە.
بەپێی ئەو زانیارییانەی لیژنەکە ئاشکرایانکردووە، ئەگەر نەخۆشییەکە ڤایرۆسی بێت چارەسەری ئاسانە و لە ماوەی حەوت بۆ 10 رۆژدا چاکدەبێتەوە یان بە هەندێک چارەسەری ئاسان چاکدەبێتەوە.
