نوێنەری سوریا لە نەتەوە یەكگرتووەكان دەڵێت، ڕووداوەكانی ئەمدواییەی شاری حەسەكە لە چێوەی “هەوڵەكانی واشنتنە بۆ سەرلەنوێ بەگەرخستنەوەی داعش و پێدانی بیانوویەك بۆ هێشتنەوەی هێزەكانی”.
بەسام سوباغ، نوێنەری هەمیشەیی سوریا لە نەتەوە یەكگرتووەكان لەمیانەی دانیشتنێكی ئەنجومەنی ئاسایشدا ڕایگەیاند، ئەوەی ڕوویدا و ئەوەی ڕوودەدات لە شاری حەسەكە، وا پێویست دەكات لەسەر ئەنجومەنی ئاسایش كە بەشێوەی خێرا چاو بخشێنێت بە كاریگەرییەكانی ئەم ڕووداوە مەترسیدارانە.
وتیشی، ئەم ڕووداوانە لە ئاكامی “سووربوونی حكومەتەكانی هەندێك لە وڵاتانە لە هەڵنەگرتنی بەرپرسیارێتیی گەڕاندنەوەی تیرۆرستان و خێزانە دەستبەسەركراوەكانیان لە خێوەتگاكان و ناوەندەكانی دەستگیركردن لە باكووری ڕۆژهەڵاتی سوریا (مەبەست ڕۆژئاوای كوردستانە)، كە بەشێوەیەكی كۆتایی ببێتەهۆی سنووردانان بۆ بوونیان لەسەر خاكی سوریا”.
نوینەرەكەی سوریا ئاماژەی بەوەشكرد، ڕووداوەكەی حەسەكە لە ئەنجومەنی ئاسایش دەخوازێت كار لەسەر كۆتاییهێنان بە بوونی هێزەكانی ئەمریكا لە باكووری ڕۆژهەڵاتی سوریا و ناوچەی “تەنەف” بهێنێت.
ئەو لێدوانانە لەكاتێكدایە دوێنێ هێزەكانی سوریای دیموكرات (هەسەدە) كۆنتڕۆڵكردنەوەی تەواوەتی بەندیخانەی غوێران-ی لە شاری حەسەكە ڕاگەیاند و نزیكەی هەزار چەكداری داعشیش خۆیان ڕادەستكردووەتەوە.
هێرش و پەلامارەكەی داعش پێنجشەممەی ڕابردوو 20ی كانونی دووەم بۆسەر بەندینخانەكە دەستیپێكرد، لەو ماوەیەدا هەسەدە لەڕێی هەڵمەتی وردەوە پلانەكەی پووچەڵكردەوە.
