بەهۆی ئەو شەپۆلە بەفربارینەوە ڕووی لە ناوچەکە کردووە، 700 خێزانی ئێزدی لە چیای شەنگال لەناو چادرەکانیاندا لەناو بەفر گیریان خواردووە و لە بارودۆخێکی قورسدان.
بەپێی زانیارییەکان، بەهۆی نالەباری کەشوهەواوە، گەیشتنی خواردن و پێداویستی بە کامپی “سەردەشت” لە چیای شەنگال ئەستەم بووە و ئەو سەدان ئێزدییە لەو ناوچەیە پێویستیان بەهاوکارییە.
ڤیان دەخیل، ئەندامی پەرلەمانی عێراق، کە خۆشی ئێزدییە لەسەر ئەو بارودۆخە نوسیویەتی، “پێویستە نەک ئێستا دواتریش چارەسەرێک بۆ کێشەی ئەو کەسانە بدۆزرێتەوە، بەتایبەت ئەگەر ڕێککەوتننامەی شەنگال جێبەجێبکرێت”.
لە ساڵی 2014ەوە، زیاتر لە 700 خێزانی ئێزدی لە ترسی پەلاماری چەکدارانی داعش خۆیان گەیاندە بەرزاییەکانی چیای شەنگال و بەهۆی ناسەقامگیری دۆخی سیاسی و ئەمنی شەنگالەوە، تا ئێستا ئەو خێزانانە لەو بەرزانییانەدا ماونەتەوە.
