بەپێی زانیارییەکانی تۆڕی میدیایی ئێستا، ژمارەیەک هاوڵاتی لە هەولێر و سلێمانی بەهۆی بەفر و شەختەوە کەوتوون و ئەندامێکی جەستەیان شکاوە و گەیەندراونەتە نەخۆشخانە.
بەپێی زانیارییەکان تەنها لە سلێمانی 17 هاوڵاتی سەردانی نەخۆشخانەی شاریان کردووە و دەست یان قاچیان شکاوە و دوو حاڵەتی خوێنبەربوونی مێشکیش بەهۆی کەوتنەوە لە نەخۆشخانە تۆمارکراوە.
هاوکات سەرکەوت کاڕەش، وتەبێژی بەرگریی شارستانی هەولێر ڕایگەیاندووە، “بەهۆی کەش و هەوا و بەستنی زەوییەوە ژمارەی ئەو کەسانەی بەربوونەتەوە و ئەندامێکی جەستەیان شکاوە لە نەخۆشخانەکان زیادیکردووە.
بەهۆی دابەزینی پلەکانی گەرماوە بۆ ژێر سفر، لە زۆرینەی ناوچەکانی هەرێم زەوی بەستوویەتی و هاتوچۆ و بەرگریی شارستانی و تیمەکانی فریاکەوتن، هۆشداری دەدەنە هاوڵاتییان لە ماڵەکانی خۆیاندا بمێننەوە.
