دادگاى فیدراڵیی عێراق له دانیشتنى ئه‌مڕۆیدا سكاڵا تۆماركراوه‌كه‌ى هاوپه‌یمانیی فه‌تحى ڕه‌تكرده‌وه و داوای هەمواركردنەوەی یاسای هەڵبژاردن دەكات.
ئه‌مڕۆ دووشه‌ممه دانیشتنێكى دیكه‌ى دادگاى فیدراڵی له‌باره‌ى سكاڵاكه‌ى هاوپه‌یمانیی فه‌تح بۆ هه‌ڵوه‌شاندنه‌وه‌ى ئه‌نجامه‌كانى هه‌ڵبژاردن به‌ڕێوه‌چوو.
به‌پێی هه‌واڵی میدیا عێراقییه‌كان، له دانیشتنه‌كه‌دا دادگا بڕیاریدا سكاڵاكه‌ى هاوپه‌یمانیی فه‌تح بۆ هه‌ڵوه‌شاندنه‌وه‌ى ئه‌نجامه‌كانى هه‌ڵبژاردن ڕه‌تبكاته‌وە و ڕایگەیاند، بڕیارەكانی دەستەی دادوەریی دادگاكە یەكلاكەرەوەن و مایەی تانەلێدان نین.
له دانیشتنه‌كه‌دا دادگا بڕیاریدا تێچووى سكاڵاكه‌ى فه‌تح بە هاوپەیمانێتییەكە ببژێرێت و فەتح قەرەبووی ئەو تێچووە بكاتەوە. لە هەمان دانیشتندا دادگای فیدراڵی داوای لە ئەنجومەنی نوێنەرانی داهاتووی عێراق كرد یاسای هه‌ڵبژاردنه‌كان هه‌مواربكاته‌وه و جیاكردنەوە و ئەژماركردنی دەنگەكان بە دەستی بێت نەك ئەلیكترۆنی.
هه‌رچه‌نده دانیشتنه‌كه‌ى دادگاى فیدراڵی له‌كاتێكدابوو كه له‌به‌رده‌م ناوچه‌ى سه‌وز خۆپیشاندان بەڕێوەدەچێت، هێزه ئه‌منییه‌كانیش به‌ده‌ورى ناوچه‌ى سه‌وز بڵاوه‌یان پێكرابوو، به‌ڵام دواجار دواى چه‌ندین دانیشتن دادگا بڕیارى یه‌كلاكه‌ره‌وه‌ى دا.
پێشتریش قه‌یس خه‌زعه‌لی، ئه‌مینداری گشتیی عه‌سائیب ئه‌هلى حه‌ق ڕایگه‌یاندبوو، دادگاى فیدراڵی له‌ژێر فشارى ده‌ره‌كیدا ئه‌نجامه‌كانى هه‌ڵبژاردن په‌سه‌ندده‌كات.
لە 10ی ئۆكتۆبەری ڕابردووەوە هەڵبژاردن كراوە بەڵام بەهۆی تانەدان و سكاڵای بەشێك لە لایەنەكانەوە تائێشتا ئەنجامەكانی هەڵبژاردن پەسەندنەكراون.
