بەڕێوەبەرایەتیی دەروازەی نێودەوڵەتیی حاجی ئۆمەران ڕایگەیاند، بۆ ڕێگریکردن لە بڵاوبوونەوەی گۆڕاوی ئۆمیکرۆن، کۆماری ئیسلامیی ئێران پێدانی ڤیزای لە ئەمڕۆ شەممەوە بۆ ماوەی دوو هەفتە ڕاگرتووە.
لە ڕاگەیەندراوێکدا کە دەروازەی نێودەوڵەتیی حاجی ئۆمەران لەزاری کونسوڵگەریی کۆماری ئیسلامیی ئێرانەوە بڵاویکردووەتەوە، ئاگاداری خوازیارانی وەرگرتنی ڤیزای ئێران دەکاتەوە، به‌مه‌به‌ستی ڕێگریكردن له‌بڵاوبوونه‌وه‌ی گۆڕاوی نوێی كۆرۆنا (ئۆمیكرۆن)، پێدانی ڤیزای گه‌شتیاری و زیاره‌ت له ڕۆژی شه‌ممه 25ی كانونی یه‌كه‌می 2021ـەوە بۆ ماوه‌ی دوو هه‌فته ڕاده‌گیرێت.
هه‌روه‌ها ئەو هاوڵاتییە بیانییانەی به‌مه‌به‌ستی گه‌شتكردن بۆ ئێران له گشت سنووره فه‌رمیی زەمینی، ده‌ریایی و ئاسمانییه‌كانه‌وه گەشتدەکەن، پێویسته كارتی وەرگرتنی ڤاكسین (كه 15 ڕۆژ به‌سه‌ر ژه‌می دووه‌مدا تێپه‌ڕبووبێت) و هه‌روه‌ها پشكنینی نێگەتیڤی كۆرۆنایان هەبێت (PCR)، کە ماوه‌یەکەی کەمتر لە 96 كاتژمێربێت.
بەپێی ڕاگەیەندراوەکە، گەشتی کۆماری ئیسلامیی ئێران لەو ماوەیەدا بۆ کەسانی بیانی تەنها ئەم گرووپانە ڕێگەپێدراوە:
1- ئه‌وانه‌ی مۆڵه‌تی مانه‌وه (اقامە)یان له كۆماری ئیسلامیی ئێراندا هه‌یه.
2- ئه‌وانه‌ی ڤیزای خوێندنیان هه‌یه، (خوێندكاری قوتابخانه ئایینیه‌كان، خوێندكارانی زانكۆكانی كۆماری ئیسلامیی ئێران).
3- ئه‌وانه‌ی ڤیزای چوونەژوورەوەیان هەیە (بۆ بازرگانه‌كان).
4- ئه‌وانه‌ی ڤیزای مافی كاركردنیان هه‌یه.
5- ئه‌وانه‌ی ڤیزای چارەسەری نەخوشییان هه‌یه (دەرمان).
6- ئه‌وانه‌ی ڤیزای وه‌به‌رهێنانیان هه‌یه.
7- ئه‌وانەی مۆری چوونه‌ده‌ره‌وه و سه‌ردانكردنی پۆلیسی كۆچ و پاسپۆرتیان هه‌یه.
