ئاسایشی گەرمیان ئاشکرایکرد، لەم مانگەدا توانیویانە باندێکی نۆ کەسی دەستگیربکەن کە تۆمەتباربوون بە بەکارهێنان و بازرگانیکردن بە ماددەی هۆشبەر و پێشینەی تاوانی دیکەشیان هەبووە.
لە کۆنگرەیەکی ڕۆژنامەوانیدا عوسمان عەبدولکەریم وتەبێژی ئاسایشی گەرمیان ڕایگەیاند، لەم مانگەدا بە دوو قۆناغ باندێکی نۆ کەسیان دەستگیرکردووە کە تۆمەتباربوون بە بەکارهێنان و بازرگانیکردن بە ماددەی هۆشبەرەوە.
ئاسایشی گەرمیان دەڵێت، ئەو باندە لە قۆناغی یەکەمدا پێنج کەسیان لێ دەستگیرکراوە و دووانیان دانیان بەوەدا نا کە بازرگانیکردنیان بە ماددەی هۆشبەرەوە کردووە و سێ کەسیشیان دانیان بە بەکارهێنانیدا ناوە.
ئاماژەیان بەوەشکردووە، کە کەسێکیان دەستگیرکردووە داڵدەی یەکێک لە تۆمەتبارەکانی داوە، تۆمەتبارەکان سەرجەمیان خەڵکی کەلار و دەوروبەری بوون.
هەروەها لەو هەڵمەتەدا دەستگیراوە بەسەر 150 گرام ماددەی هۆشبەردا لە جۆرەکانی (کریستاڵ و حەشیش).
هەروەها ڕایگەیاند، لە چێوەی ئەو هەڵمەتەدا کە دەستیان پێکردووە، دوێنێ دووشەممە 26ی ئەیلول دەستیانگرتووە بەسەر 139 کیلۆگرام ماددەی هۆشبەری جۆری کریستاڵدا.
