ڕوسیا بە بڕی 7.2 ملیار ڕۆبڵ كۆمپانیای گوگڵی سزادا، هۆكارەكەی پەیوەندی بە ناوەڕۆكی بابەتەكانییەوە هەیە.
ئەمڕۆ هەینی دادگایەكی ڕوسیا سزایەكی دارایی بەسەر گوگڵدا سەپاند كە بڕەكەی 7 ملیار و 200 ملیۆن ڕۆبڵە (دەكاتە 87 ملیۆن یۆرۆ) و هۆكارەكەشی لانەبردنی هەندێك بابەتی سەر پێگەكەیە.
ئەو بابەتانەی ڕوسیا داوای سڕینەوەی كردوون (بەبێ ئەوەی ئاشكرایانبكات)، بەلای حكومەتی ڕوسیاوە قەدەغەن و لەلایەن گەروە كۆمپانیاكانی ئەمریكاوە بڵاوكراونەتەوە، وەك نووسینگەی میدیایی دادگاكانی مۆسكۆ بڵاویكردووەتەوە.
كێشەی نێوان حكومەتی ڕوسیا و كۆمپانیای گوگڵ پێشینەی هەیە، پێشتر مۆسكۆ داوای لە هەردوو كۆمپانیای گوگڵ و ئەپڵ كردبوو هەژمار و پێگەكانی ئەلێكسی ناڤالنی كەسایەتیی ئۆپۆزسیۆنی ڕوسیا بسڕنەوە.
لە دوو مانگی ڕابردوودا دەستەی چاودێریی پەیوەندییەكانی ڕوسیا ڕایگەیاندبوو، كۆمپانیای گوگڵ پابەند نەبووە بەو سزا داراییانەی بەسەریدا سەپێندراون كە 32.5 ملیۆن ڕۆبڵن و پێشێلكاریی دیكەی بەرامبەر بە سیاسەتەكانی ڕوسیا ئەنجامداوە، بۆیە هەوڵدەدات سزای دارایی زیاتر بەسەر كۆمپانیاكەدا بسەپێنێت تا ڕادەی نێوان 5 – 20%ی داهاتی ئەمساڵی كۆمپانیاكە لە ڕوسیا.
