یەكێتیی نیشتمانیی كوردستان داوای زیندووكردنەوەی خاڵێكی ڕێككەوتنەكەیان لە پارتی دەكات، كە تایبەتە بە دانانی كاندیدێكی یەكێتی بۆ پۆستی پارێزگاری كەركوك، كە پێشتر لەگەڵ ئەو حزبە وەكو یەكێك لە مەرجەكانی بەشداریكردنیان لە پێكهێنانی كابینەی نۆیەم دیارییكردبوو.
لە دوای ڕووداوەكانی ئۆكتۆبەری ساڵی 2017، پۆستی پارێزگاری كەركوك لای كورد نەماوە، لە دوو هەڵبژاردنی دوای ئەو ڕووداوانەشدا كورد زۆرینە بووە و یەكێتیی نیشتمانیی كوردستانیش زۆرترین دەنگ و كورسیی لە پارێزگاكە هێناوە، سەرەڕای ئەوەی لە ماوەی ڕابردوو یەكێتی لەگەڵ لایەنە كوردستانییەكان، جگە لە پارتی، ڕێككەوتن كە كاندیدێكی كورد بۆ ئەو پۆستە دابنێن، بەڵام تا ئێستا نەتوانراوە پارێزگارێكی كورد – یەكێتی دابنرێت.
بەپێی زانیارییەكانی تۆڕی میدیایی ئێستا، كە لەسەرچاوە تایبەتەكانیەوە دەستیكەوتووە، لە كۆبوونەوەی ئەمڕۆیان لەگەڵ شاندەكەی مەكتەبی سیاسیی پارتی، یەكێتی باسی زیندووكردنەوەی ئەو خاڵەیان كردووە و ڕایانگەیاندووە، ئەوان پێشتر ڕێككەوتنیان بۆ پێكهێنانی حكومەتی هەرێم كردووە، كە لەنێو خاڵەكاندا بەڕوونی باسی دانانی پۆستی پارێزگاری كەركوك كراوە، كە وەكو یەكێك لە مەرجەكانی بەشداریكردنی یەكێتی لە كابینەی نۆیەمدا دانراوە.
سەرچاوەكە وتیشی، پێویستە لەگەڵ گفتوگۆكانی پێكهێنانی حكومەتی نوێی عێراق، كار بۆ دانانی پارێزگارێكی كورد – یەكێتی بكرێت بۆ شوێنگرتنەوەی راكان جبوری.
لەسەر هەمان پرس، ڕەوەند مەلا مەحمود ئەندامی سەركردایەتیی یەكێتی و بەرپرسی مەڵبەندی كەركوكی حزبەكە بە تۆڕی میدیایی ئێستای ڕاگەیاند، “پۆستی پارێزگاری كەركوك هەر لەسەرەتاوە ڕێككەوتنی لەسەر كراوە، بەشێوەیەك پۆستی سەرۆكی هەرێم بۆ پارتی بێت، پۆستی پارێزگاری كەركوك و سەرۆك كۆمار بۆ یەكێتی بێت”.
دووپاتیكردەوە، ئەوە ڕێككەوتنێكی كۆنە لەنێوان یەكێتی و پارتی كراوە و هەموو لایەنە كوردستانییەكانیش ئاگادارن”.
بۆیە بەرپرسی مەڵبەندی كەركوكی یەكێتی پێیوایە، بەهۆی ئەوەی لەدوای ساڵی 2003وە كە یەكێتی باڵادەستبووە لە پارێزگاكە و زۆرترین دەنگی بەدەستهێناوە، ئێستاش بە مافی خۆی دەزانێت لە پێكهێنانی حكومەتی نوێی عێراقدا لەگەڵ ئەو لایەنەی كە حكومەت پێكدەهێنێت ڕێككەوتن بكات، تا كاندیدێكی خۆی بۆ پۆستی پارێزگاری كەركوك دابنێت، چونكە بەركەوتەی هەڵبژاردنی خۆیەتی.
كورد دەیەوێت لەتەواوی پۆستەكانی كەركوك هاوسەنگی بێتەوەئارا
لەچەند ڕۆژی ڕابردوو لایەنە كوردستانییەكانی كەركوك، جگە لەپارتی، كۆبوونەوەیەكیان ئەنجامدا و باسی پڕكردنەوەی پۆستی پارێزگار و پۆستەكانی دیكەی كوردیان كرد.
ڕەوەند مەلا مەحمود، كە بەشداربووی كۆبوونەوەكە بوو، ئاشكراشیكرد، “لەمێژە غەدر لە كورد دەكرێت لە پۆستەكانی نێو فەرمانگەكان، چونكە لە سێ هەڵبژاردنی ڕابردوو نیوەی كورسییەكان هی كورد بووە، بەڵام دابەشكردنی پۆستەكانی پارێزگاكە وەكو بەركەوتەی هەڵبژاردن نیە”.
بۆیە بەرپرسەكەی مەڵبەندی یەكێتی دووپاتیكردەوە، لە كۆبوونەوەكەدا پێداگرییان لەسەر ئەوەكردووە، كە چۆن لایەن و پێكهاتەكانی دیكە پۆستیان هەیە، كوردیش بەهەمانشێوە بەركەوتەكانی خۆی لە پۆستەكان وەرگرێت.
سەكردەكەی یەكێتی نەیشاردەوە كە لە دانانی كاندیدێكی كورد بۆ پۆستی پارێزگاری كەركوك “بە پلەی یەك پارتی بیانووی دروستكرد، بۆئەوەی لەدەست كورد بچێت، ئەوكاتە كە ئەنجومەنی پارێزگا زۆرینەی لەدەستی كورد بوو، دەمانتوانی بە ئاسانی پارێزگارێكی كورد بۆ كەركوك دابنێن، بەڵام پارتی ئامادەنەبوو”.
”ئەوان هەر شتێك بۆ كورد و لەنێو كورددا بۆ یەكێتی بێت، دژی دەوەستنەوە، هەر ئەوانیش بوونە هۆكاری ئەوەی كە پۆستی پارێزگار لای كورد نەبێت”، ڕەوەند مەلا مەحمود وای وت.
بەرپرسی مەڵبەندی كەركوكی یەكێتی بۆ یەكەمجار ئاشكراشیدەكات، ئەو كاتەی حكومەتی هەرێم پێكهێنرا، “ئێمە وەكو یەكێتیی نیشتمانیی كوردستان ڕێككەوتنمان بۆ دروستكردنی حكومەتی هەرێم كرد لەگەڵ پارتی، یەكێك لە خاڵەكان دانانی پارێزگارێكی كورد بوو بۆ یەكێتی”.
بەرپرسەكەی یەكێتی دەڵێت، “پارتی ئەوكات ئامادەبوو ئەو خاڵەمان لەگەڵ جێبەجێ بكات، بەڵام كاتێك كە حكومەتی هەرێمی پێكهێنا، پاشگەزبووەوە”.
بۆیە ئەو سەركردەیەی یەكێتی دوودڵ نەبوو لەوەی بڵێت، “هەمیشە پارتی، كە كارێكی بە كورد و یەكێتی دەبێت، هەموو ڕێككەوتنێك دەكات، بەڵام كە گەیشتە سەر جێبەجێكردنی، پاشگەز دەبێتەوە، چونكە ئەوەندەی بڕوای بە حزبایەتییە، ئەوەندە بڕوای بە كوردایەتی نییە”.
