زانایەكی ئوسترالی كرمێكی دۆزییەوە كە هەزار و 306 پێی هەیە، بەڵام چاوی نییە، كرمەكە ناوی (ئۆمیلیبس بیرسیڤۆنی)یە.
برۆنۆ بوزاتۆ-ی زانا كرمەكەی دۆزیوەتەوە و سەرەتا پێشبینی كردووە وەك هاوشێوەكانی 750 پێی هەبێت، بەپێی راپۆرتێك كە ئاژانسی ڕۆیتەرز لە گۆڤاری “نەیچەر”ی زانستییەوە بڵاویكردوەتەوە.
درێژیی كرمەكە 95 ملیمەتر و پانییەكەی كەمترە لە ملیمەترێك، سەرێكی شێوە لولپێچ، دەمێكی شێوە دەنوك، شاخی هەستەوەری هەیە، بەڵام چاوی نییە.
بۆ یەكەمجار ئەم جۆرە لە كرم لە ساڵی 1928 دۆزراوەتەوە، وا پێشبینی دەكرا كە لەناوچووبێت، تا ئەوكاتەی پۆل ماریك-ی زانا بە زیندوویی لە كالیفۆرنیا دۆزییەوە.
جۆرەكانی كرمەكە لە چاڵی قوڵدا دۆزراونەتەوە، بەناوی (بیرسیڤۆنی) یەكێك لە خوداوەندەكانی یۆنانییەوە ناونراوە.
زانایان هەشت جۆریان بەدرێژایی چەندین مانگ لە قوڵایی نێوان 15 بۆ 60 مەتری ناو زەوی دۆزییەوە، لە چاڵێكدا كە بۆ گەڕان بەدوای كانزاكان لە ڕۆژئاوای ئوسترالیا هەڵكەندرابوو.
بوزاتۆ چەندین خۆراك كە “ماددەی شیبووەوەی ڕاكێشەر (جاذبة)ی ئەم جۆرە كرمەی تیابوو” دانا، دوای دۆزینەوەشی سەرەتا باوەڕی وابوو كرمێكی دۆزیوەتەوە كە نزیكەی 800 پێی هەیە، بەڵام دوای پشكنینی ورد بۆی دەركەوت زیاتر لە هەزار پێی هەیە.
ئەم جۆرەی كرم لە تاریكیی تەواودا دەژی بەهۆی نەبوونی چاوەوە، هەستەكانی دیكەی وەك بەركەوتن و بۆنكردن بۆ درككردن بە ژینگە و چواردەورەكەی بەكاردەهێنێت، باوەڕوایە كەڕووەكان دەخوات.
