برێت مەكگۆرك لە هەولێر لەگەڵ نێچیرڤان بارزانی كۆبووەوە، بەرپرسەكەی ئەمریكا دڵنیاییەك دەدات و سەرۆكی هەرێمیش كاتی سەردانەكەی بە گرنگ لەقەڵەم دەدات.
برێت مەكگۆرگ، ڕێكخەری كۆشكی سپیی ئەمریكا بۆ كاروباری خۆرهەڵاتی ناوەڕاست و باكووری ئەفریقا نیوەڕۆی ئەمڕۆ لە هەولێر لەگەڵ نێچیرڤان بارزانی، سەرۆكی هەرێمی كوردستان كۆبووەوە و ڕایگەیاند، ئەمریكا لە پشتگیریكردنی عێراق و هەرێمی كوردستان بەردەوام دەبێت و بۆ ڕووبەڕووبوونەوە و تێكشكاندنی یەكجاریی داعش، دەتوانن پشتی پێببەستن، هەروەها پرسە و سەرەخۆشی پێشكەش بە خانەوادەی شەهیدانی پێشمەرگە كرد، كە ئەمدواییە لە بەرەنگاربوونەوەی داعشدا شەهید بوون.
بەپێی ڕاگەیەندراوێكی كۆبوونەوەكە، خۆیەوە نێچیرڤان بارزانی كاتی سەردانەكەی مەكگۆرك-ی بۆ عێراق و هەرێمی كوردستان بە گرنگ لە قەڵەمداوە و دووپاتیكردەوە، ”لە سەروبەندی گۆڕانی ئەركی هێزەكانی ئەمریكا و هاوپەیمانان لە عێراق، دووپاتكردنەوەی بەردەوامیی پابەندیی ئەمریكا بە پشتگیریكردنی عێراق و هەرێمی كوردستان، پەیامێكی گرنگە”.
لە كۆبوونەوەكەدا كە باڵیۆزی ئەمریكا لە عێراق و كونسوڵی گشتییان لە هەولێر ئامادەیبوون، هەڵبژاردن و ئەنجامەكانی و پێشبینی بۆ داهاتووی پرۆسەی سیاسی لە عێراق، گفتوگۆی نێوان هێز و لایەنە عێراقییەكان، هەوڵەكان بۆ دامەزراندنی حكومەتی نوێی فیدراڵ، دۆخی ئەمنی و سەربازی و ئابوریی وڵات، هێرش و پەلامارەكانی داعش، هاریكاری و هەماهەنگیی نێوان پێشمەرگە و سوپا، پەیوەندییەكانی هەولێر ـ بەغدا، گفتوگۆی ستراتیژیی عێراق- ئەمریكا و دەرفەتەكانی برەودان بە پەیوەندییەكانی هەردوولا تاوتوێكران.
هەردوولا هاوڕابوون كە داعش مەترسییەكی ڕاستەقینەیە و بۆ ڕووبەڕووبوونەوە و تێكشكاندنی، هێشتا عێراق پێویستی بە بەردەوامیی پشتگیریی هاوپەیمانیی نێودەوڵەتی هەیە، هەروەها هاریكاری و هەماهەنگیی هێز و لایەنە عێراقییەكانیان بە پێویستزانی بۆ ئەوەی بتوانن حكومەتێكی كۆكەرەوە لە وڵات پێكبهێنن، كە وەڵامدەرەوەی داواكارییەكانی هاوڵاتییانی عێراق بێت و ئارامی و سەقامگیریی بپارێزێت، وەك ئەوەی لە بەشێكی دیكەی ڕاگەیەندراوەكەدا هاتووە.
هەروەها دۆخی ناوخۆی هەرێمی كوردستان، پەیوەندییەكانی عێراق لەگەڵ وڵاتانی ناوچەكە و جیهان، دۆخی ناوچەكە بەگشتی، دوایین پێشهاتەكانی سوریا و پرسی كورد لەو وڵاتە و چەند بابەتێكی دیكەی جێی بایەخی هاوبەش، تەوەرێكی دیكەی كۆبوونەوەكە بوو.
