سێ کۆمپانیای پاککەرەوەی ناوەندی شاری سلێمانی بەهۆی نەناردنی بەشە بودجەکەیانەوە لە وەزارەتی شارەوانی و گەشتوگوزار کارەکانیان ڕاگرتووە.
دانا عیسا نوێنەری کۆمپانيا مانگرتووەکان بە تۆڕی میدیایی ئێستای ڕاگەیاند، “سێ مانگە ئەو سێ کۆمپانیای ئەرکی پاککردنەوەی ناوەندی شاریان لە ئەستۆگرتووە پارەیان لە وەزارەتی شارەوانییەوە بۆ نەهاتووە و کرێکارەکانیان دوو مانگە هیچ موچەیەکیان وەرنەگرتووە”.
نوێنەری کۆمپانیاکان ڕایگەیاند، “خۆیان توانیویانە پارەی مانگێکی کرێکارەکانیان بدەن، بەڵام هێشتا دوو مانگ موچەیان ماوە و بڕە پارەکەش کەمە ئەگەر نەدرێت ئەو کەسانە ناتوانن ژیانی ڕۆژانەیان بەڕێبکەن”.
کێشەی کۆمپانیاکانی پاککەرەوە ئەوەیە، کە نوسراوەکانیان لەلایەن وەزارەتی شارەوانی و گەشتوگوزارەوە وەڵام نادرێتەوە و بەهۆی ئەوەوە بەشە بودجەکەشیان ڕاگیراوە و پێان نەدراوە.
