وتەبێژی یەکێتیی نیشتمانیی کوردستان ڕایده‌گه‌یه‌نێت، یەکێتی ھەر بڕیارێک بدات لە ڕێگای میدیای فه‌رمى حزبه‌كه‌وه بڵاویدەکاتەوە و سەرجەم ئەو دەنگۆ و ھەواڵانەش ڕه‌تده‌كاته‌وه کە باس لە گۆڕانکاریی لە کارگێڕ و مەکتەبەکان ده‌كرێن.
ئەمین بابەشێخ، وتەبێژی یەکێتیی نیشتمانیی کوردستان دەربارەی پرۆژەی چاکسازییەکان و گۆڕانکاریەکانی ناو یەکێتی ڕوونكردنه‌وه‌یه‌كى بڵاوكرده‌وه و ده‌ڵێت، ” یەکێتی ھەر بڕیارێک بدات لە رێگای میدیای فه‌رمى حزبه‌وه بڵاویدەکاتەوە و سەرجەم ئەو دەنگۆ و ھەواڵانەشی بڵاوکراونەتەوە کە باس لە گۆڕانکاری لە کارگێڕ و مەکتەبەکان دەکرێت دوورە لە ڕاستییەوە.”
جه‌ختى له‌وه‌شكردووه‌ته‌وه، “ھەر گۆڕانکاریی و چاکسازییەک لە ئیدارە وحزبدا بڕیاری لێبدرێت لە بەرژەوەندیی کۆمەڵانی خەڵکی هەرێمی کوردستان و گەشەپێدانی ئۆرگانەکانن، بە ڕێڕەوی حزبیدا تێدەپەڕێت و لە مەکتەبی ڕاگەیاندنی یەکێتییەوە بۆ ڕایگشتی ئاشکرادەکرێت و بڵاودەکرێتەوە”.
وته‌بێژى یه‌كێتى له به‌شێكى دیكه‌ى ڕوونكردنه‌وه‌كه‌یدا ده‌ڵێت، “لێرەوە داوا لە کەناڵەکانی ڕاگەیاندن دەکەین بەرپرسیارانە و پیشەییانە مامەڵە لەگەڵ ڕووداو و گۆڕانکارییە سیاسی و ئیداریی ڕێکخراوەیی یەکێتی بکەن”.
