جێگری سەرۆکی حکومەتی هەرێم دڵنیایی دەداتە کەسوکاری شەهیدان و ئەنفالکراوان و زیندانیانی سیاسی لە هەموو پارێزگاکانی کوردستان کە وەرگرتنی پارچە زەوی مافی خۆیانە و ڕێکارە یاساییەکانی ئەو پڕۆسەیەش تەواو بووە.
قوباد تاڵەبانی، جێگری سەرۆکی حکومەتی هەرێم لە ڕونکردنەوەیەکدا ڕایدەگەیەنێت، ” لەوانەیە بە لێدوان و ڕوونکردنەوەی نابەرپرسانە، دڵگران بووبن و وا هەستتانکردبێت کەسانێک هەن، ڕێگرن لەبەردەم وەرگرتنی زەوییەکانتان کە مافێکی ڕەوا و یاسایی خۆتانە، من لێرەوە دڵنیاتان دەکەمەوە کە هیچ کەس و هێزێک نیە، بتوانێت لەبەردەم مافە ڕەواکانتان بوەستێتەوە”.
قوباد تاڵەبانی ئاماژەی بەوەشکردووە، ” ئەو زەوییانەی وەری دەگرن هەموو ڕێکارێکی یاسایی پێویستی بۆ كراوە و بەئیمزای بەندە و بەپێی سێ فەرمان لە کابینەی هەشتەمی حکومەتی هەرێمی کوردستان دەرکراون و رێکارەکان لەکابینەی نۆیەمدا تەواوکراون، کە ناوەڕۆکی سێ فەرمانەکە بریتییە لە دابەشکردنی زەوی بەسەر 11142 کەس لە کەسوکاری شەهید و ئەنفالکراوان و زیندانیانی سیاسی لە هەموو پارێزگاکانی کوردستان”.
جێگری سەرۆکی حکومەت ڕاشیگەیاندووە، ” بۆیە دووبارە دڵنیاتان دەکەمەوە بە هیچ شێوەیەک قابلی قەبوڵ نابێت ڕێگریتان لێ بکرێت بۆ وەرگرتنی مافێکی ڕەوا و یاسایی ئێوەی دڵسۆز و قوربانیدەر”.
