ماوەی 17 ساڵە یانەیەکی ڕەنگ کوردستانی لە قۆناغ و خولە جیاجیاکانی تۆپی پێی سوید یاری دەکات، یانەکە لەماوەی ئەو 17 ساڵەدا بە چەندین نشێوی و هەوڵی ناوگۆڕین و کێشەی ئابوریدا تێپەڕی، بەڵام ئێستا لە خولی پلە یەكەكانی سوید یاریدەكات.
یانەی داڵكورد دوێنێ گەیشتە خولی پلە یەکەكانی سوید ناسراو بە (Superettan) و ئێستا یانە کوردییەکە دەیەوێت بگاتە بەرزترین ئاستی خولەكانی تۆپی پێ لە سوید، ئەمساڵیش ئاستێکی ناوازەی پێشکەشکرد.
دوێنێ یانەی تۆپی پێی داڵکورد توانی یارییە چارەنووسسازەکەی بەرامبەر بە یانەی گایس لە شاری یۆتۆبۆری بە ئەنجامی 1-1 کۆتایی پێبێنێت، بەم ئەنجامەش یانەی داڵکورد سەرکەوتنی خۆی بۆ خولی پلە یەکەکانی تۆپی پێی سوید (Superettan) مسۆگەر کرد، هاندەرانی داڵکورد خۆشحاڵن بەوەی کە تەنها یەک هەنگاویان ماوە بۆ خولی پلە نایابەکانی سوید (Allsvenskan).
داڵکورد، یانەیەکە لە وڵاتی سوید، لە 26ی ئەیلوولی 2004 لەلایەن چەند پەنابەرێکی کوردی سوید دامەزرێنرا، لەسەرەتادا لە خولی پلە حەوتەوە دەستیپێکرد.
یانەکە کوردانی پارچەکانی کوردستانی کۆکردووەتەوە، لەگەڵ ئەوەش یاریزانی سویدی و ولاتانی دیكەش لە ڕیزی تیمی یانەکەدا وەردەگیرێن.
کێشەی ئابوری و گۆڕینی ناوی یانەکە
لەماوەی دوو ساڵی ڕابردوودا یانەکە تووشی چەند کێشەیەکی ئابوری بوو، بەهۆیەوە هەوڵێک هەبوو بۆ گۆڕینی ناوی یانەکە بۆ برایەتی، لەگەڵ ئەوەش لۆگۆی یانەکە کە ئاڵای کوردستانە، بگۆڕێت بە بزنە کێوییەک، وەک هێمایەک بۆ سروشتی کوردستان.
لە سەرەتای ئەمساڵەوە پێشنیازکرا ناوی یانەی داڵکورد، کە تاکە یانەی بە ناسنامە کوردە لە وڵاتی سوید، بگۆڕێت بۆ برایەتی، ئەمە ناڕەزایەتیی توندی لایەنگران و بەشێک لە دەستەی بەریوەبردنی یانەکەی لێکەوتەوە، بۆیە وەک دەردەکەوێت یانەکە پەشیمانبووەتەوە لە گۆڕینی ناوەکەی و لابردنی ئاڵای كوردستان.
گۆڕانکارییەکان تەنها ناوی یانەکە نەبوو، بەڵکو بڕیاربوو لۆگۆکەیان بەتەواوی بگۆڕن کە ئاڵای کوردستانە، بەڵام پێشنیازەکە جێبەجێنەکرا.
لەبارەی گۆڕانکارییەکانەوە، شوکری دەمیر، سکرتێری یانەی داڵکورد بە بەشی کوردیی ڕادیۆی سویدی ڕاگەیاندبوو، “بڕیاربوو بە گۆڕینی ناوی یانەکە لایەنگران و هەوادارانی یانەکە زیاتر کۆبکرێنەوە و ڕۆڵی هەبێت لە زیادکرنی لایەنگرانی، بەڵام ئەم پرسە لە کۆنگرەی یانەکە دەرهێنرا”.
ئەگەرچی یانەی داڵکورد کۆنگرەی خۆی ئەنجامدا، بەڵام پرسی گۆڕینی ناوەکەی بە “برایەتی” باسنەکرا و تەوەری گفتوگۆ نەبوو، بۆیە ناوی یانەکە وەک خۆی مایەوە.
